Kóptegen kitaptardy alyp júrý qajettiligi birtindep joıylady
Taıaýda oqýlyqtardyń 100 paıyzy sıfrlandyrýdan ótedi, tıisinshe kitaptardy alyp júrý qajettiligi birtindep joıylady. Bul týraly baǵdarlamashylardy merekesimen quttyqtaǵan Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın óziniń Facebook-tegi resmı paraqshasynda jazdy, dep habarlaıdy Almaty-akshamy.kz tilshisi.
«Memleket basshysynyń tapsyrmasy boıynsha biz artyq búrokratıany joıa otyryp, 175 bıznes-úderisti jetildirdik. Al, 2025 jylǵa deıin biz 5 myń bıznes-proseske tolyq reınjınırıng jasaıtyn bolamyz. Búgingi kúni memlekettik qyzmetterdiń 94%-y onlaın túrde qoljetimdi. Onyń ishinde 25 qyzmet proaktıvti formatta kórsetiledi. Eń suranysqa ıe memlekettik qyzmetter smartfondarda qol jetimdi jáne ótken jylmen salystyrǵanda olardy paıdalaný 17,5 paıyzǵa artqan. Sonymen qatar, biz halyqqa qyzmet kórsetý ortalyqtaryn jańǵyrtýdy bastadyq. Qazirdiń ózinde 8 jańa front-ofıs jumys istep tur», - dep jazdy mınıstr.
Baǵdat Mýsınniń málimetinshe, «Ehealth» elektrondy densaýlyq saqtaý júıesin qurý jumystary júrgizilýde. Ol azamattarǵa qyzmet kórsetý ornyna qaramastan, syrqatynyń tarıhy men barlyq dıagnozdaryn bir bazada toptastyratyn ulttyq densaýlyq pasportyn qalyptastyrýǵa múmkindik bermek.
«Aýyldyq mektepter ınternet-ınfraqurylymymen tolyq qamtamasyz etilgen. Biraq bul turǵyda áli de belsendi túrde jumys isteý kerekpiz. Oqýshylar men muǵalimder ınternetti oqý prosesinde paıdalana alýy úshin mektepishilik ınternetti taratý jelilerin damytý qajet. Jaqyn arada oqýlyqtardyń 100 paıyzy sıfrlandyrylatyn bolady jáne kóptegen kitaptardy alyp júrý qajettiligi birtindep joıylatyn bolady» - dep málim etti Baǵdat Mýsın.
Mınıstr jumystardyń nátıjesin baıandaı kele, áriptesterin búginigi baǵdarlamashylar kúnimen quttyqtady.