Ál-Farabı atyndaǵy QazUÝ jańa oqý jylynda zamanaýı úlgide kúrdeli jóndeýden ótken oqý ǵımarattary men jataqhanalardy paıdalanýǵa bermek. Bilim ordasynyń basshysy Janseıit Qanseıituly Túımebaev qurylys barysymen tanysyp, áli de qalpyna keltirý jumysy aıaqtalmaǵan nysandardy josparǵa sáıkes aıaqtaýǵa tapsyrma berdi.
Qazirgi sátte ýnıversıtet aýmaǵynda ornalasqan 14 jataqhana stýdentterdiń qonystanýyna ázirlenip, 25 tamyzda stýdentter ıgiligine beriledi. Onyń ishinde №6 stýdentter úıindegi jóndeý jumystary bitýge jaqyn, №4 jáne №7 jataqhanalardaǵy kúrdeli jóndeý jumysy qyrkúıektiń sońyna deıin jalǵasady. Ózge jataqhanalar 25 tamyzda kelgen stýdentterdi qabyldaýǵa saqadaı saı.
Buǵan qosymsha úsh oqý ǵımaratynda kúrdeli jóndeý jumystary júrgizilip jatyr. Bul ǵımarattardyń esik-terezeleri jáne edeni tolyǵymen aýystyrylǵan. Buryn lınoleým bolsa, qazir sapaly jańa lamınattar tóselip, aýdıtorıalar jańa úlgidegi zamanaýı dızaınmen árlenip, bezendirilýde.
Ekinshi jáne úshinshi oqý ǵımarattary 1 qyrkúıekte oqý jylyn bastaýǵa ázir. Al birinshi oqý ǵımaratyndaǵy jumystar aıdyń aıaǵyna deıin sozylady.
Aıta keterlik jaıt, jóndeý barysynda tek sapaly qurylys materıaldary qoldanylýda. Rektor tapsyrmasymen jańa oqý jylynda stýdentterdi qabyldaýǵa daıyn bolý úshin jumysshylar sany arttyryldy.
Odan bólek, birinshi, ekinshi, úshinshi oqý ǵımaraty men rektorattyń syrty da kúrdeli jóndeýden ótpek. Bul maqsatta suıyq travertın dep atalatyn jańa tehnologıa qoldanylady. Bul jumystar eki aı merzimde aıaqtalmaq. Bolashaqta Stýdentter saraıyn da osy sekildi jóndeýden ótkizý josparlanýda. Salynǵaly ǵımarattardyń ishki-syrtqy bóligine mundaı kúrdeli jóndeý jumystary júrgizilmegendikten, kóptegen materıaldardyń tozyǵy jetken. Aldaǵy ýaqytta bul olqylyqtardyń ornyn toltyrý josparda bar.
Masanshy kóshesinde ornalasqan tórtinshi oqý ǵımaratyna da kosmetıkalyq jóndeý jumystary jasaldy. Qazir stýdentterdi qabyldaýǵa tolyǵymen daıyn. Munda fılosofıa jáne polıtologıa fakúlteti, kolej jáne oqý ordasynyń lıseıi ornalasqan. Ýnıversıtet aýmaǵynda ornalasqan Jas ǵalymdar úıiniń de syrtqy bóligi jóndeý jumystaryn qajet etedi. Saın kóshesiniń boıyndaǵy Biliktilikti arttyrý ınstıtýtynyń jataqhanasyndaǵy jumystar da qazir aıaqtalyp, oqý jylyn bastaýǵa ázir tur.
Keıbir jataqhanalarǵa 15–20 jyldyń kóleminde kúrdeli jóndeý jumystary júrgizilmegendikten, edendegi lınoleýmdardyń tozyǵy jetip, santehnıkalardyń kópshiligi isten shyqqan. Sol sebepti, aldaǵy eki jylda barlyq jataqhanaǵa kúrdeli jóndeý jumystary júrgiziledi. Tek qana qabyrǵasyn qaldyryp, esik-tereze, qubyr júıeleri, tipti shatyryna deıin aýystyrylady.
Basqarma tóraǵasy – rektor Janseıit Qanseıituly ǵımarattardyń árqaısysyn jiti aralap shyǵyp, árbir jataqhananyń jertólesinde, aınalasynda hımıalyq tazalaý, aıaqkıim jóndeý sekildi stýdentterdiń qajettiligine jaraıtyn oryndar ashyp, sporttyq trenajer ornatý týraly naqty tapsyrmalar berdi.