Elde balalardyń kitap oqýǵa degen qyzyǵýshylyǵyn arttyrý isi jolǵa qoıylǵan
2020 jyly elimizde Memleket basshysynyń tapsyrmasy boıynsha «Oqýǵa qushtar mektep» jobasy bastaldy. Oǵan mektep kitaphanalaryn kórkem ádebıetpen qamtamasyz etý, oqýshylardy kitap oqýǵa tartý úshin is-sharalar ótkizý, kitaphanalarda qolaıly jaǵdaı jasaý, jóndeý jáne jabdyqtaý, kitaphanashylardyń biliktiligin arttyrý sıaqty birqatar sharalar kirdi.
Mektepterde kún saıyn mindetti túrde 20 mınýt kitap oqýdy dástúrge aınaldyrdy. Mektep kitaphanalarynyń janynan 440 zamanaýı kovorkıng-ortalyq ashylyp, jumys istep jatyr.
Kóptegen qazaqstandyq joǵary oqý orny kitaphanalaryn avtomattandyrady jáne qaıta jabdyqtaıdy. Bul baǵytta belsendi jumys stýdentterge kitap izdeý jáne alý boıynsha yńǵaıly servıs usyný, sondaı-aq kitaphanashylarǵa kitaphana qorymen jumys isteý úshin yńǵaıly qural jasaý úshin júrgiziledi, dep habarlaıdy Almaty-akshamy.kz
BǴM baspasóz qyzmetiniń habarlaýynsha, bıyl elimizde mektep kitaphanalarynyń qory eki mıllıon kórkem ádebıetpen tolyqqan.
Engizilip jatqan jańashyldyqtar oqyrman sanyn arttyrýǵa, qyzmet kórsetý sapasyn jaqsartýǵa jáne jumys ýaqytyn qysqartýǵa múmkindik berdi. Mysaly, jańa tehnologıalardy engizýdiń jáne JOO-nyń qalalyq mekteptermen belsendi jumysynyń arqasynda Qaraǵandy tehnıkalyq ýnıversıtetinde oqyrman sany 17 myńǵa deıin artty.
S.Toraıǵyrov ýnıversıtetinde stýdentterdiń kitap oqýǵa degen qyzyǵýshylyǵyn arttyrý maqsatynda kitaphanada aýdany 1 560 sharshy metr kovorkıng-ortalyq, konferens-zal jáne stýdentterge arnalǵan demalys aımaǵy ashyldy.
«Bilim jáne ǵylym mınıstrligi joǵary oqý oryndarynyń, mektepter men kolejderdiń aldyna bilim alýshylardyń oqýǵa degen qyzyǵýshylyǵyn arttyrý, mekteptermen jumysty jandandyrý, jaǵdaıdy jaqsartý jáne qajetti aqparatty izdeýdiń tıimdi joldaryn qamtamasyz etý mindetin qoıdy. Sondyqtan qazir JOO-lar avtomattandyrylǵan júıeler men ózgerister engizý, talaptarǵa sáıkes júıelerdi pysyqtaý jáne personaldy oqytý boıynsha sharalar qabyldap jatyr. Sonymen qatar ýnıversıtetter kitaphana qoryn jańa basylymdarmen tolyqtyryp jatyr. Eń bastysy, ýnıversıtet kitaphanalary mektep oqýshylary úshin ashyq bolady. Medıaresýrstar sany da artty – elektrondy oqýlyqtar, ensıklopedıalar, ádistemelik quraldar jáne basqa da ádebıetter kóbeıdi. Elektrondyq kitaphanalardyń tolyq mátindi jáne mýltımedıalyq resýrstary, sonyń ishinde Web of Science jáne Scopus halyqaralyq bazalary qoljetimdi boldy. Bul sharalar stýdentterimiz úshin barlyq jaǵdaıdy jasaý úshin qabyldanyp jatyr», – dedi Bilim jáne ǵylym vıse-mınıstri Qýanysh Erǵalıev.