Oqý-aǵartý mınıstrligi «Jaratylystaný» oqýlyǵynda kórsetilgen (6-synyp) silteme eresekterge arnalǵan saıtqa baǵyttaıtynyn aıtty.
Respýblıkalyq bilim berý mazmunyn saraptaý ǵylymı-praktıkalyq ortalyǵy Instagram áleýmettik jelisinde jarıalanǵan 6-synyptyń «Jaratylystaný» oqýlyǵy (red.«Atamura», 2018 jyl) týraly beınejazbaǵa qatysty jaýap berdi. Bul týraly Almaty-akshamy.kz. Elitar.kz-ke silteme jasap habarlaıdy.
«Bul oqýlyq memlekettik saraptamadan ótip, 2017 jyly orys tilinde oqytatyn mektepterde qoldanýǵa ruqsat etilgen. Oqýlyqty paıdalanǵan 6 jyl ishinde mektepterden mundaı shaǵym túsken joq. §33 «Jasýsha álemine ekskýrsıa» taqyrybyndaǵy oqýshyǵa berilgen tapsyrmada jasýsha organellalarynyń qyzmetine baılanysty qosymsha málimet alý úshin ınternet-resýrstary jazylǵan. Resýrstardyń biri retinde biofile.ru saıty kórsetilgen. Saraptama kezinde bul «Bıofıl» ǵylymı-aqparattyq jýrnalynyń saıty ekeni anyqtaldy. Oqýlyqtardaǵy naqty veb-resýrstardy kórsetý balalardyń aqparatty izdeý jáne taldaý daǵdylaryn damytýǵa yqpal etedi dep esepteldi. Ortalyqty tekserý barysynda bul saıttyń qazirgi ýaqytta jumys istemeıtini anyqtaldy. Degenmen braýzerlerden saıtty terip, izdegen kezde kúmándi tanysý saıttaryna baǵyttaıdy. Web.archive.org muraǵat qyzmeti arqyly júrgizilgen taldaý saıttyń 2011 jyldan beri jumys istep kele jatqanyn kórsetti. Biraq, sońǵy jyldary belsendiligi kúrt tómendegen», – delingen habarlamada.
Ortalyq aldaǵy ýaqytta baspalarmen birlesip, oqýlyqtardaǵy veb-saıttarǵa siltemelerdi tekserý jumysyn júrgizbek.
«17 aqpan men 9 naýryz aralyǵynda saıt ákimshiligi jańa URL mekenjaıyn tirkedi. Ortalyq oqýshylardyń aqparattyq qaýipsizdiginiń mańyzyn eskerip, quqyq qorǵaý jáne basqa da memlekettik organdarǵa tıisti suranys joldady. Sonymen qatar, baspalarmen birlesip, qoldanystaǵy qaǵaz jáne elektrondy oqýlyqtardaǵy veb-saıttarǵa siltemeler tekserilip, muǵalimder men ata-analarǵa tıisti nusqaý haty rásimdeledi» , – delingen jaýapta.