Qazaqstan Respýblıkasy Prezıdentiniń Jarlyǵymen Astana qalasynan, Aqmola jáne Atyraý oblystarynan birqatar muǵalimder marapattaldy.
Olardyń halyqtar arasynda beıbitshilikti, dostyq pen yntymaqtastyqty nyǵaıtýǵa, memlekettik tildi damytýǵa sińirgen eńbekteri zor, dep habarlaıdy Almaty-akshamy.kz Oqý-aǵartý mınıstrliginiń resmı saıtyna súıenip.
Oqý-aǵartý mınıstri Ǵanı Beısembaev eńbegi joǵary baǵalanǵan pedagogtermen kezdesti.
Mınıstr ustazdarǵa bolashaq urpaqty tárbıeleýdegi úlesteri úshin alǵys aıtyp, pedagogterdi qoldaý jáne olardyń kásibı mártebesin kóterý - bilim berý salasyndaǵy mańyzdy basymdyqtardyń biri bolyp tabylatynyn atap ótti.
«Bizdiń ortaq mindetimiz - sapaly bilim men tárbıe berý, óskeleń urpaq úshin eń jaqsy úlgilerdi qalyptastyrý, bilim men múmkindikter beretin qoǵam qurý. Sizderdiń kásibılikterińiz, balalardy oqytý men tárbıeleýdegi adaldyqtaryńyz úshin shyn júrekten rızashylyǵymdy bildiremin. Sizder elimizdiń barlyq muǵalimderiniń jarqyn beınesisizder, sizderdiń mamandyqqa adaldyqtaryńyz bizdi jańa jetistikterge shabyttandyrady», - dep atap ótti mınıstr.
Pedagogter óz kezeginde memlekettiń pedagog qyzmetin joǵary baǵalaǵanyna zor rızashylyqtaryn bildirip, kásibı ósýge, oqytý ádisterin jetildirýge qatysty óz oılarymen bólisti.
«Balalardy oqytý arqyly biz tek bilim berip qana qoımaı, jeke tulǵa retinde qalyptastyramyz, oqýshylarymyzǵa joǵary maqsat qoıý jáne oǵan jetý daǵdysyn sińiremiz jáne olarǵa tabysqa jetýdiń jolyn úıretemiz. Meniń jumysym - bul mamandyq qana emes, bul meniń elimniń bolashaǵy aldyndaǵy mısıam jáne jaýapkershiligim», - dedi Aqmola oblysy Araıly aýylynan kelgen orta mektep muǵalimi Anastasıa Irýbaeva.
Memleket basshysy memlekettik tildi damytýǵa jáne dostyqty nyǵaıtýǵa sińirgen eńbegi úshin memlekettik nagradalar tabystaǵan pedagogterdiń ishinde Astana qalasy Qaıyrbekov atyndaǵy №2 mekteptiń muǵalimi Elızaveta Aleksandrovna Shnaıder İİ dárejeli «Dostyq» ordenimen, Aqmola oblysy Araıly aýylyndaǵy orta mektep muǵalimi Anastasıa Irýbaeva «Shapaǵat»medalimen, Atyraý qalasyndaǵy №3 mektep — gımnazıasynyń muǵalimi Tatána Nesterovna Lúbına «Eren eńbegi úshin» medalimen marapattaldy.