QR Oqý-aǵartý mınıstri Ǵanı Beısembaev elimizdiń qurmetti pedagogteri, «Qazaqstannyń Eńbek eri», «Qazaqstannyń eńbek sińirgen ustazy» ataqtarynyń ıegerlerimen kezdesti.
Olardyń qatarynda Aıagúl Mırazova, Alına Soloveva, Alma Shýkyjanova sıaqty elimizdegi bilim berý júıesiniń qalyptasý jolynda eńbegi sińgen esimderi eleýli tulǵalar da bar, dep habarlaıdy Almaty-akshamy.kz sala mınıstrligine silteme jasap.
Qazaqstannyń Eńbek eri Aıagúl Tóreqyzynyń aıtýynsha, Memleket basshysynyń qoldaýynyń arqasynda elimizde pedagog mártebesine erekshe kóńil bólinýde. Degenmen júıeni jetildirý úshin ony úzdiksiz damytý qajet. Ustaz ár muǵalimniń basty mindeti - balanyń rýhanı-adamgershiligi joǵary tulǵa retinde qalyptasýyna yqpal etý dep sanaıdy.
«Bizdiń moınymyzda úlken jaýapkershilik - elimizdiń bolashaǵy tur. Sondyqtan, jas ustazdar akademıalyq bilimdi damytyp qana qoımaı, balalardy adamı qasıetter men moraldyq prınsıpterge sáıkes tárbıeleýi qajet dep sanaımyn. Prezıdent ulttyq quryltaıda basymdyq bergen qundylyqtar – barlyq pedagogıkalyq jáne ata-analar qaýymdastyǵy úshin temirqazyqqa aınalýy tıis», - dep atap ótti Aıagúl Mırazova.
Óz kezeginde mınıstr ustazdarǵa eren eńbegi men balalarǵa degen súıispenshiligi jáne janashyrlyǵy úshin alǵys bildirdi. Olardyń úzdik tájirıbeleri men parasat-paıymdary óńirlerde taratylýy kerektigin aıtty.
«Ybyraı Altynsarın «Muǵalim bolý – mansap emes, joǵarydan berilgen syı» dep aıtqan. Muǵalimniń eńbegi kópqyrly ári jan-jaqty, ońaı emes. Al qazirgi pedagog – ol barlyq áriptesteri úshin kóshbasshy jáne úlgi bolýy tıis. «Qazaqstannyń Eńbek eri», «Qazaqstannyń eńbek sińirgen ustazy» ataǵyn alǵan muǵalimder mektepti basqarý máselelerine, tárbıe isine salalyq kásibı sarapshy retinde qatysýy qajet», – dedi Ǵanı Beısembaev.
Oqý-aǵartý mınıstri sońǵy jyldardaǵy bilim berýdegi oń ózgeristerge toqtaldy. Bul jalaqy kólemin ulǵaıtý, júktemeni azaıtý, kásibı biliktilikti arttyrý, ınfraqurylymdy jańǵyrtý jáne t. b. Atap ótsek, búgingi tańda elimizdiń 2906 mektebinde balalar bir aýysymda bilim alýda.
Aıta keteıik, Memleket basshysy elimizde alǵash ret «Qazaqstannyń eńbek sińirgen ustazy» memlekettik nagradasyn bekitti. 2021 jyldan beri 46 pedagog osy marapattyń ıegeri, al úsh pedagog «Qazaqstannyń Eńbek eri» ataǵyn ıelendi.