Kezdesýde bilim berý salasyn damytýdaǵy negizgi mindetter men basymdyqtar talqylandy.
Ǵanı Beısembaev bilim berý elimizdiń áleýmettik saıasatynyń negizgi basymdyqtarynyń biri retinde Memleket basshysynyń tarapynan aıtarlyqtaı qoldaýǵa ıe bolyp otyrǵanyn atap ótti, dep habarlaıdy aqshamnews.kz Oqý-aǵartý mınıstrligine silteme jasap.
Bilim berý ınfraqurylymdaryn jańǵyrtý boıynsha birqatar sharalar júzege asyrylýda, onyń ishinde jańa mektepter salý, zamanaýı kabınettermen jabdyqtaý, bilim berý uıymdaryn renovasıalaý jumystary júrgizilýde.
«Bilim berýdegi basty mindetterdiń biri onyń sapasyn arttyrý bolyp tabylady. Birinshi ret zań júzinde «bilim sapasy» uǵymy bekitilip, Bilim berý sapasyn baǵalaýdyń ulttyq júıesiniń úlgisi qalyptastyryldy. Alaıda, bilim berý isindegi basty tulǵa – pedagog bolyp qala beredi jáne tutas qoǵamnyń bolashaǵynyń tabystylyǵy onyń kásibıligimen tyǵyz baılanysty. Pedagogterdiń jumys jasaýy úshin jaıly orta qalyptastyrý mańyzdy, ol úshin óńirler jergilikti jerlerde zańdardyń júzege asyrylýyn qamtamasyz etýi kerek. Ásirese, jańashyldyǵy men shyǵarmashylyǵy bilim sapasyn jaqsartýǵa, balalarymyzdyń damýyna yqpal etken pedagogterdi qoldaýǵa kóńil bólý kerek», - dep atap ótti mınıstr.
Ǵanı Beısembaev pedagogterdiń qoǵamdaǵy rólin kúsheıtýge erekshe nazar aýdaryp, pedagogterge barynsha qoldaý kórsetýdi tapsyrdy. Bul - pedagogterdiń jumys jaǵdaıyn jaqsartý, biliktilikterin arttyrý jáne balaǵa sapaly bilim men sanaly tárbıe berýdegi basty tulǵa retinde baǵalaý.
Sondaı-aq vedomstvo basshysy ótken oqý jylynan bastap oqý prosesine engizilgen «Birtutas tárbıe baǵdarlamasyna» toqtalyp ótti. Bıylǵy oqý jylynda baǵdarlama qaıta jańartylyp, ádiletti memleket, jaýapty azamat jáne progresıvti ult qundylyqtarymen tolyqtyryldy. Sonymen qatar óńirlerge «Bilim berýdegi ózgeristerdiń 1000 kóshbasshysy» badarlamasy, balalardyń quqyqtaryn qorǵaý, bilim sapasyn arttyrý, mektepterdiń ata-analarmen yntymaqtastyǵy boıynsha jumystardy kúsheıtý qajet.