Kúni keshe Almaty jurtshylyǵy «Han Sultan. Altyn Orda» operasynyń premerasyn tamashalaǵany týraly jazǵan edik. Sol premerasyna arnaıy barǵan tilshilerimiz Shaǵataı rólinde oınaýshy akter Islam HAMZAEVtyń pikirin jazyp alǵan edi.
«Opera teatrynda búgin – tarıhı sát. Tarıhı oqıǵaǵa qurylǵan, el basyna kún týǵan sonaý qıyn shaqtyń taǵdyry sahnalandy. Úrgenishtiń qıraýy Joshy hannyń Altyn ordany qurýy. Bir sózben aıtqanda, Shyńǵys urpaqtary arasynda handyq ıntrıganyń bolýy baıandalyp, bajaılandy. Operada Shyńǵys han urpaqtarynyń qandaı bolǵandyǵy, olardyń bir-birine qarym-qatynasy, kezdesken sátteri, osynyń biri-bári operanyń óneboıynan kórinis tapty», – deıdi akter Islam Hamzaev.
«Shaǵataı –– Shyńǵys hannyń eń súıikti uly. Ol – Shaǵataı on tórt jasynan áke jolyn qýyp, ózin bılikke laıyqty adam ekenin kórsete bilgen jan. Operaǵa daıyndalǵan kezde Shyńǵys urpaqtaryn ózimshe zerttep, zerdeledim. Shaǵataı degen kim? Ne úshin Joshymen jaǵalasty? Joshyǵa «Merkittiń urpaǵy» dep aıtyp qalyp, arazdasqan kezi de bar» deıdi Islam.
«Úrgenish halqyn qyryp tastaǵan Shaǵataı. Joshy – Shaǵataıǵa qaraǵanda, júregi jumsaq adam. Al, Shaǵataı bolsa, tym qatal. Ákesi Shyńǵys neni aıtsa, sony oryndaıtyn bolǵan. Búgingi qoıylymda Shaǵataı beınesi ózgeshe qyrynan kórindi. Ol – tarıh sahnasyndaǵy uly tulǵa. Tabanasty dúnıelerdi oılap taýyp, aqyry opyq jeıtin kezderim bar», – deıdi akter.
«Shaǵataı – uly tulǵa. Onyń boıyndaǵy ójet minez búgingi qazaqtardyń da boıynda bar. Oǵan elikteıtinderdiń baryn joqqa shyǵarmaımyz. Onyń minezinde iske týra, batyl barý basymdaý. Bul qasıet te ár qazaqtyń boıynda bar. Biraq, Shaǵataı syqyldy qanypezer bolýdyń qajeti joq.
Batyr da myqty adamnyń, álbette, osal tusy da bolady. Onysy áıelge degen kózqarasynan baıqalady. Osyny túsiný maǵan biraz qıyndyq týǵyzǵany bar. Shaǵataıdy zerdeleý barysynda buǵan da kóz jetkizdim», – dedi akter I.Hamzaev.