Osy baǵytta jumysty kúsheıtý tapsyryldy.
Qazaqstan Úkimeti aldaǵy vegetasıalyq kezeńde ońtústik óńirleriniń aýyl sharýashylyǵy taýaryn óndirýshilerin sýarmaly sýmen qamtamasyz etý máselelerine arnalǵan keńes ótkizdi, dep habarlaıdy Almaty-akshamy.kz Primeminister.kz-ke silteme jasap.
Shara barasynda Ekologıa, geologıa jáne tabıǵı resýrstar, aýyl sharýashylyǵy, energetıka mınıstrleri, sondaı-aq Qyzylorda, Túrkistan jáne Jambyl oblystarynyń basshylyǵy Aral-Syrdarıa baseıninde qalyptasqan jaǵdaı týraly baıandady.
Bıyl sýdyń az kelýine baılanysty Qyrǵyz Respýblıkasynyń aýmaǵyndaǵy Toqtoǵul sý qoımasyna jınalǵan sýdyń kólemi ótken jylǵy deńgeıge jetpeıdi. Qyrǵyzstannyń óziniń sý-energetıkalyq qajettilikterin qamtamasyz etýi tıis ekenin eskere otyryp, Qazaqstan aýmaǵyna jiberiletin sý kóleminiń tómendeý qaýpi bar.
Premer-Mınıstr Álıhan Smaıylov Ekologıa, geologıa jáne tabıǵı resýrstar, sondaı-aq Energetıka mınıstrlikterine kóktemgi-jazǵy kezeńde elimizdiń ońtústik óńirleriniń sýarmaly jerlerin sýmen qamtamasyz etý úshin túbegeıli sharalar qabyldaýdy tapsyrdy. Álıhan Smaıylov transshekaralyq ózenderdiń resýrstaryn paıdalaný boıynsha ózara tıimdi sheshimder qabyldaý úshin Qyrǵyzstanmen jáne Ózbekstanmen qarqyndy kelissózder júrgizý qajet ekenin atap ótti. Aýyl sharýashylyǵy mınıstrligine sý únemdeý tehnologıalaryn jáne agrarlyq salada sý resýrstaryn tıimdi paıdalanýdyń basqa da quraldaryn engizý aıasyndaǵy jumysty kúsheıtý tapsyryldy.
