Bul azamattardyń isi boıynsha memlekettik advokat jumys istep jatyr
Ońtústik Koreıaǵa zańsyz kirdi dep kúdikke ilingen Qazaqstannyń eki azamatynyń isi sotqa joldandy. Bul týraly Syrtqy ister mınıstrliginiń resmı ókili Aıbek Smadıarov málim etti, dep habarlaıdy Almaty-akshamy.kz QazAqparatqa silteme jasap.
«Koreıadaǵy bizdiń azamattarmen elmizdiń konsýly kezdesti. Ýaqytsha tergeý ızolátorynda ustaý boıynsha olardyń shaǵymdary joq. Ustalǵan adamdardyń týystarymen turaqty baılanystamyz. Prokýratýra isti sotqa joldady. Sottyń alǵashqy otyrysy mamyr aıynyń ortasynda ótýi múmkin», - dedi A. Smadıarov elordadaǵy baspasóz máslıhatynda tilshiler suraǵyna jaýap bere otyryp.
Onyń aıtýynsha, bul azamattardyń isi boıynsha memlekettik advokat jumys istep jatyr.
Eske salaıyq, naýryzdyń sońynda eki otandasymyz Ońtústik Koreıaǵa kirýge tyıym salynǵanyna qaramastan atalǵan elge zańsyz aıaq basqany týraly habarlaǵan edik.
10 sáýir kúni Ońtústik Koreıaǵa zańsyz kirgen jerlesterimiz tergeý ızolátorynda qamaýda otyrǵany belgili boldy.