250 kólik zańsyz tirkelgen.
Uıymdasqan qylmysqa qarsy kúres basqarmasynyń málimetinshe, bul tizbekte “Azamattarǵa arnalǵan úkimet” AQ-ǵa qarasty mamandandyrylǵan halyqqa qyzmet kórsetý ortalyǵynyń qyzmetkerleri, sondaı-aq Ońtústik Koreıadan kólik alyp kelýdi jolǵa qoıǵan K. esimdi azamat kúdikti dep tanyldy.
«K. esimdi azamat mamandandyrylǵan halyqqa qyzmet kórsetý ortalyǵynyń qyzmetkerlerimen qylmystyq kelisimge kelip, Qazaqstan Respýblıkasynyń aýmaǵynda kólik quraldaryn tirkeýge negiz bolatyn qujattarǵa jalǵan málimetter engizgeni belgili boldy. Osy zańsyz áreketteriniń nátıjesinde kúdikti bastapqy memlekettik tirkeý úshin belgilengen alymdar, ıaǵnı 340 mln teńgeden astam sommany tóleýden jaltarǵan. Tergeýdiń osy kezeńinde 250 kóliktiń osyndaı qylmystyq tizbekpen alyp kelinip, tirkelgeni anyqtaldy», – dedi Almaty qalalyq PD uıymdasqan qylmysqa qarsy kúres basqarmasynyń bastyǵy Janat Nurǵalıev.
Baıandamashy QR QK-niń 385-baby (Jalǵan qujattardy, mórtabandardy, mórlerdi, blankilerdi, memlekettik poshta tólemi belgilerin, memlekettik nagradalardy qoldan jasaý, daıyndaý nemese ótkizý) boıynsha qozǵalǵan qylmystyq isti Almaty qalalyq PD anyqtaý basqarmasynda tergep jatqanyn atap ótti.