Bıyl 6 aıda 19 myńnan astam adamnan qaterli isik anyqtaldy.
Bul týraly QR Densaýlyq saqtaý birinshi vıse-mınıstri Jandos Búrkitbaev aıtty, dep habarlaıdy Almaty-akshamy.kz QazAqparatqa silteme jasap.
«Bıyl densaýlyq saqtaý uıymdary jelisiniń jańa memlekettik normatıvi bekitildi. Turǵyndar sany 50-den 500 adamǵa deıingi aýyldarda medısınalyq pýnkt ashý, halqy 500-den 1500 adamǵa deıingi aýyldarda feldsherlik-akýsherlik pýnkt qurý kózdeledi.
5000-nan astam turǵyn turatyn aýyldarda medısınalyq-sanıtarıalyq alǵashqy ortalyqtar qurylatyn bolady. Jańa normatıvter jergilikti atqarýshy organdardyń qalaýy boıynsha dárigerlik ambýlatorıalardyń ýchaskelerin keńeıtýdi kózdeıdi. «Altyn saǵat» qaǵıdaty boıynsha aýyl halqyna ýaqtyly shuǵyl medısınalyq kómek kórsetý úshin 32 kópbeıindi aýdanaralyq aýrýhanalar kópbeıindi ortalyq aýdandyq aýrýhanalar bolyp qaıta qurylady», - dedi birinshi vıse-mınıstr Ortalyq komýnıkasıalar qyzmetindegi baspasóz máslıhatynda.
Onyń atap ótýinshe, onkologıalyq aýrý kúdigine ilikken pasıentter úshin «jasyl dáliz» engizildi. Iaǵnı, mundaı kúdikke ilikken pasıentter kezekten tys ári shekteýsiz dárigerdiń qabyldaýyna kiredi.
«2022 jyldyń 6 aıynda «jasyl dáliz» arqyly 25 myńnan astam adam ótti. Onyń ishinde 19 myńnan astam pasıentte qaterli isiktiń jańadan qalyptasý dıagnozy anyqtaldy», - dedi Jandos Búrkitbaev.