Ótken jyly «Qýatty óńirler – El damýynyń draıveri» Ulttyq jobasyna 1,4 trln teńge jumsalǵan.
Jobanyń 2021 jylǵa arnalǵan is-sharalaryna jalpy 1,5 trln teńge bólingen bolatyn. Onyń 93 prosenti ıgerildi, dep habarlaıdy Almaty-akshamy.kz. Qazaqtv.com saıtyna silteme jasap.
Bul týraly Úkimet otyrysynda elimizdiń Ulttyq ekonomıka mınıstrli habarlady. Álibek Qýantyrov málim etkendeı, joba eki baǵyt boıynsha júzege asyrylyp jatyr.
Onyń birinshisi – «Bazalyq qyzmetterge teń qoljetimdilik» jáne ekinshisi – «Kólik baılanysyn qamtamasyz etý», onda 4 mindet, 20 kórsetkish jáne 96 is–shara aıqyndalǵan.
«Qýatty óńirler – el damýynyń draıveri» atty ulttyq joba óńirler arasyndaǵy aıyrmashylyqty qysqartý úshin iske qosylǵan.
«Ulttyq jobany 2021 jyly iske asyrý mynadaı nátıjelerge qol jetkizýge múmkindik berdi. Turǵyndardy aýyz sýmen qamtamasyz etý kórsetkishi 90%-ti qurady, mono- jáne shaǵyn qalalarda ınjenerlik jáne kólik ınfraqurylymynyń tozýy 57,6%-ten 45,5%-ke deıin tómendedi, 17,1 mln. sharshy metr turǵyn úı paıdalanýǵa berildi, normatıvtik kúıdegi respýblıkalyq mańyzy bar joldardyń úlesi 90%-ke deıin , al jergilikti mańyzy bar joldardyń úlesi – 80%-ke deıin ósti.112 myńǵa jýyq turaqty jáne ýaqytsha jumys oryndary quryldy», - dedi QR Ulttyq ekonomıka mınıtsri Á. Qýantyrov.
Atalǵan jobaǵa 2022 jyly 1,8 trln teńge, onyń ishinde búdjetten tys – 709 mlrd teńge qarastyrylǵan. Bıylǵy jyldyń 1 tamyzyndaǵy kórsetkish boıynsha 528 mlrd teńge ıgerilip úlgergen.