Búgin Almatyda "Taza Qazaqstan" respýblıkalyq aksıasynyń "Ónegeli urpaq" aptalyǵy aıasynda eriktiler, qoǵam qaıratkerleri, memlekettik qyzmetkerler jáne týǵan ólkesine beı-jaı qaramaıtyn belsendi qala turǵyndary zeınetkerlerge, Uly Otan soǵysy men eńbek maıdanynyń ardagerlerine úıleriniń aýlalaryn tazalap, kórkeıtýge kómektesip jatyr. Sonymen qatar búgin turmystyq qoqysty suryptaý, qaýipti qaldyqtardy durys kádege jaratý boıynsha eko-jobalar iske asyrylýda.
Igi is atqarylǵan meken-jaılardyń biri – Karımov kóshesi 187a. Belsendiler osy meken-jaıda turatyn múmkindigi shekteýli zeınetker Sholpan Nurmaǵambetovaǵa kómektesti, aıalýy ananyń batasyn aldy, dep habarlaıdy Almaty-akshamy.kz.
«Qalanyń Jumyspen qamtý jáne áleýmettik baǵdarlamalar basqarmasynyń jelisi boıynsha bul meken-jaı tańdaldy, sebebi munda múmkindigi shekteýli zeınetker turady. Bizdiń vedomstvonyń segiz adamy búgin ıgi iske atsalysyp, almatylyqtarǵa osy bastamamen úlgi kórsetkisi keledi. Bul ıgi is bir rettik bolmaıtynyna jáne óziniń laıyqty jalǵasyn tabatynyna senimdimin», - dep atap ótti Almaty qalasy Jumyspen qamtý jáne áleýmettik baǵdarlamalar basqarmasynyń bólim basshysy Abylaı Tólegenov.
Zeınetkerdiń úıine kelgen belsendiler aýla qorshaýyn boıap qana qoımaı, úı aýmaǵyndaǵy qoqystardy, aramshópterdi shyǵarýǵa kómektesti.
«Men kórsetilgen kómekke alǵysymdy bildiremin. Jaqynda maǵan ota jasalyp, mundaı jumysqa kúshim bolmap edi. Biraq kóktemde aýlada isteıtin jumys kóp», - deıdi Sholpan Nurmaǵambetova.
Jalpy megapolıste naýqan bastalǵannan beri qala turǵyndaryna ártúrli tústegi 2,4 myń lıtr boıaý tegin taratyldy. Qala turǵyndary alynǵan lak-boıaý materıaldaryn óz aýlalaryndaǵy oryndyqtardy, sondaı-aq jeke úılerdegi qorshaýlar men qaqpalardy jaqsartý úshin paıdalandy.
Esterińizge sala keteıik, 8 sáýir men 8 mamyr aralyǵynda Almatyda "Almaty-bizdiń ortaq úıimiz"naýqany ótip jatyr. Árbir turǵyn qalanyń damýy úles qosa alady. Barlyq aqparat almaty.kz saıtynda jáne Almaty ákimdiginiń áleýmettik jelilerinde ornalastyrylǵan. Sondaı-aq, veb-saıtqa qala boıynsha ornalastyrylǵan bannerlerde, plakattarda jáne plakattarda arnaıy QR-kod arqyly kirýge bolady.