Naýqan aıasynda qala turǵyndary men eriktiler ardagerler men zeınetkerlerdiń aýlasyn jınap, qarıalardyń alǵysyn aldy. 30-ǵa jýyq erikti Naýryzbaı aýdany “Taýsamaly” yqshamaýdanyndaǵy Kamenskoe, 34 mekenjaıynda turatyn Uly Otan soǵysynyń ardageri Leonıd Podkolzınniń úıine bardy.
Naýryzbaı aýdanyndaǵy jalǵyz soǵys ardageriniń jasy 98-te. Ardagerdiń kúıeý balasy eriktilerge alǵysyn bildirip, ıgi isterine sáttilik tiledi.
“Naýryzbaı aýdanynyń erikti jastary “Almaty – bizdiń ortaq úıimiz” is-sharasy aıasynda ardager atamyzǵa kómektesýge keldik. Otanymyzdy qorǵaǵan batyr tulǵaǵa sheksiz alǵys bildiremiz. Úlken kisilerdiń júzindegi qýanysh bizdiń júregimizge de jylý berip, erekshe kúsh syılaıdy”, - deıdi №188 mektep-gımnazıasynyń 10-synyp oqýshysy, erikti Marǵulan Ámirbek.
“Almaty - bizdiń ortaq úıimiz” naýqany aıasynda aýdan boıynsha 200-den astam is-shara uıymdastyryldy. Jóndeý jumystarynan bastap, saıabaqtardy tazaladyq. 8 sáýirden 8 mamyrǵa deıin 102 mekenjaıǵa baryp, úılerdiń aýlasyn tazalap, ózge de jumystardy isteýimiz kerek. Biraq 3 turǵyn kómekten bas tartty. Qalǵan 99 úıge kómektesemiz. Eriktilerdiń kóbi - aýdan mektepteriniń oqýshylary. Keıbir jaǵdaıy nashar otbasylarǵa áleýmettik kómek kórsetiledi. Tek osy naýqanmen shektelip qalmaı, jazǵy demalys kezinde de kómektesemiz. Aýdanymyzdyń erikti jastary jaqsylyq jasaýǵa qulshynyp turady”, - dedi Naýryzbaı aýdany ákiminiń orynbasary Mıras Nurlanuly.