Almaty qalasynyń Naýryzbaı aýdanynda turatyn Uly Otan soǵysynyń ardageri Leonıd Nıkıtovıch Podkolzın 98 jasta. 17 jasynda maıdanǵa attanǵan ol Germanıadaǵy Jeńis kúnin atap ótken edi. Soǵys kezeńin eske alatyn ardager sol bir qandy maıdan jyldaryn esten shyǵarǵan emes, mine, 40 jyldan beri ol qoljazbalar men óleńderdi muqıat saqtap keledi. Ardagerdiń eń úlken armany - kitap shyǵarý, sol arqyly bolashaq urpaqqa mura qaldyrý.
Naýryzbaı aýdany ákiminiń orynbasary Mıras Nysanálıev atap ótkendeı, qazir eriktiler ardager jazǵan 300-den astam qoljazbany baspa formatyna ázirlep, baspahanamen kitapty shyǵarý jóninde kelisim jasaý ústinde. Eriktiler ardagerge «Taza Qazaqstan» respýblıkalyq ekologıalyq aksıasynyń «Ónegeli urpaq» aptalyǵy, sondaı – aq «Almaty-bizdiń ortaq úıimiz» naýqany aıasynda úıin tazartýǵa kómektesti. Olar ardagerdiń qorshaýy men shatyryn syrlady, úıilgen otyndy bólshektep, ardagerdiń aýlasyn retke keltirdi.
«Biz aýdandaǵy jalǵyz ardagerimizge bardyq. «Jaqynyńa járdemdes» aksıasy aıasynda aýdanda zeınetkerler, múmkindigi shekteýli jandar, eńbek ardagerleri turatyn 102 úı tańdaldy. Eriktilermen birge biz olarǵa qajetti kómektiń barlyǵyn kórsetemiz. Sonymen qatar, az qamtylǵandarǵa azyq-túlik sebetterin ákelemiz», - dedi Naýryzbaı aýdany ákiminiń orynbasary.
Onyń aıtýynsha, járdemdesý tek bir rettik aksıa emes, belsendiler aýdan aqsaqaldaryna únemi qoldaý kórsetip keledi. Jalǵyzbasty, az qamtylǵan zeınetkerlerge, soǵys jáne eńbek ardagerlerine «Almaty – bizdiń ortaq úıimiz» naýqany aıaqtalǵannan keıin de járdemdesý jalǵasatyn bolady ári osy sharany iske asyrýǵa birneshe eriktiler bekitilgen.
Esterińizge sala keteıik, 8 sáýir men 8 mamyr aralyǵynda qalada «Almaty-bizdiń ortaq úıimiz» naýqany ótip jatyr. Árbir turǵyn qalanyń damýy men tazarýyna úles qosa alady.
«Taza Qazaqstan» respýblıkalyq ekologıalyq aksıasynyń «Ónegeli urpaq» derekterine sáıkes, Almatyda eriktiler, qoǵamdyq, úkimettik emes uıymdar almatylyq zeınetkerlerge, Uly Otan soǵysy jáne eńbek maıdanynyń ardagerlerine óz aýlalaryn retke keltirýge kómektesedi. Sonymen qatar, búginde turmystyq qoqystardy suryptaý, durys emes qaldyqtardy joıý boıynsha eko-proeksıalar júzege asyrylýda.
Barlyq aqparat almaty.kz saıtynda, Almaty ákimdiginiń áleýmettik jelilerinde ornalasqan. Sondaı-aq, veb-saıtqa arnaıy QR-kod arqyly qala boıynsha ornalastyrylǵan bannerlerde, plakattarda jáne afıshalarda kirýge bolady.
Naýqannyń belsendi qatysýshylaryna arnalǵan áleýmettik jelidegi heshtegter: #AlmatyNashObshııDom, #NasMnogoGorodOdın, #AlmatyBizdińOrtaqÚıimiz, #BizKóppizQalajalǵyz.