Almaty-akshamy.kz saıtynda búgin jarıalanǵan jańalyqtarǵa sholý – kún kerýeni
Betperde taqpaıtyn boldyq
Elimizde betperde taǵý rejıminiń kúshi joıyldy. Qaýly qol qoıylǵan kúninen bastap kúshine enedi. QR Bas memlekettik sanıtarlyq dárigeri Aıjan Esmaǵambetova "Aýa-tamshy jolymen beriletin juqpaly aýrýlardyń taralýynyń aldyn alý boıynsha profılaktıkalyq sharalardy kúsheıtý týraly" 2024 jylǵy 8 aqpandaǵy qaýlysynyń kúshin joıdy. Qujatta tumaýdyń jáne basqa da jiti respıratorlyq vırýstyq ınfeksıalardyń epıdemıalyq maýsymynyń aıaqtalýyna baılanysty qaýlynyń kúshi joıylǵany kórsetilgen.
Qysqarǵan ESQ
Búginnen bastap ESQ ózgeredi, endi ádettegideı 2 emes, bir ǵana GOST faılynan turady. Ol aýtentıfıkasıa úshin de, qol qoıý úshin de jaramdy. Qazaqstanda elektrondy sıfrlyq qoltańba berý tártibine qatysty qujatqa engiziletin ózgerister 30 sáýirden bastap kúshine enedi. Soǵan sáıkes, Qazaqstan QR ST GOST R 34.10-2015 krıptografıalyq standartyna kóshedi. Jańa standart aıasynda qazaqstandyqtar 30 sáýirden bastap elektrondy sıfrlyq qoltańba alǵanda júıege kirýge arnalǵan AUTH RSA jáne qol qoıýǵa múmkindik beretin RSA faıldarynyń ornyna bir ǵana GOST faıly usynylady. Bul faıl atalǵan eki qyzmetti de júzege asyrýǵa múmkindik beredi.
Almatynyń 10 jylǵy rekordy
Almatyda sońǵy 10 jylda ekonomıkanyń rekordtyq ósýi baıqaldy. 2023 jyly Almaty qalasynyń jalpy óńirlik ónimi naqty mánde 10,1% ulǵaıyp, 24,8 trln. teńge boldy, bul sońǵy 10 jyldaǵy rekordtyq kórsetkish.
Megapolıs ekonomıkasynyń damýy joǵary ınvestısıalyq jáne iskerlik belsendilikpen qatar júrdi. 2023 jyly Almaty qalasyna 1,8 trln. negizgi kapıtalǵa salynǵan ınvestısıalar teńgesi 25,3% ósti, bul rette jeke ınvestısıa 35,5% artty.
Kelisimsiz kelissóz
Ótken aptada Amerıka Qurama Shtattarynyń Memlekettik hatshysy Entonı Blınken Qytaıda úsh kúndik saparda bolyp qaıtty. Blınken sapary álem aqparat quraldary basa nazar aýdarǵan taqyryptyń biri boldy.
Aq úıdiń bas dıplomatynyń sapary kezinde Qytaı tóraǵasy Sı Szınpın men Syrtqy ister mınıstri Van Imen joǵary deńgeıdegi kezdesýler ótkizdi. Ár eldiń sarapshylary bul joǵary deńgeıdegi kelissóz kezdesýleriniń máni men nátıjesin ózderinshe túsindirip jatyr. Qalaı degen kúnde de, Amerıka Qurama Shtattary men Qytaı Halyq Respýblıkasy arasyndaǵy eń negizgi máseleler sol kúıinde kelisimsiz qalyp qoıdy. Osydan Beıjiń men Vashıngtonnyń bul kelispeýshilikterdi sheshýi múlde qıyndap ketkenin baıqaımyz.
Tutqyndalǵan Turǵymbaev
Bir kún buryn áleýmettik jelilerde Qazaqstannyń burynǵy İshki ister mınıstri Erlan Turǵymbaevtyń ustalǵany týraly aqparat paıda boldy. Osyǵan baılanysty búgin, 2024 jyldyń 30 sáýirinde elimizdiń Bas prokýratýrasy málimdeme jasady.
"Aǵymdaǵy jyldyń 29 sáýirinde aýyr zardaptarǵa ákep soqqan bılik pen laýazymdyq ókilettikterdi asyra paıdalanǵany úshin (QK-niń 362-baby 4-bóligi) Qazaqstan Respýblıkasynyń Qylmystyq is júrgizý kodeksiniń 128-baby tártibinde ishki ister eks-mınıstri E.Z.Turǵymbaev ustaldy", dep jazylǵan Qazaqstan Respýblıkasynyń Bas Prokýratýrasynyń habarlamasynda.
«Soǵystan qaıtqan soldattar»
Jyl sanap azaıyp bara jatyr. Qazaqstan boıynsha 176 soǵys ardageri ǵana qalǵan. Bıyl Jeńistiń 79 jyldyǵyna áskerı sherý ótkizý josparlanyp otyrǵan joq.
Byltyr Qazaqstan soǵys ardagerlerine tólenetin tólemderdiń kólemi boıynsha TMD-nyń barlyq elin basyp ozǵan. Elimizde Jeńis kúnine oraı ár ardagerge 1,5 mıllıon teńge kóleminde járdemaqy berildi. Reseıde 10-nan 50 myń rúblge deıin (shamamen 50-250 myń teńge) tólendi.
«1414» ótirik aıta ma?
«Ulttyq aqparattyq tehnologıalar» AQ «1414» nómirinen jiberilgen habarlamaǵa qatysty túsinik berdi. Mamandardyń aıtýynsha, bul nómirden jiberilgen habarlamalar jalǵan emes.
«1414» nómirinen jiberilgen habarlama «eGov mobile» mobıldi qosymshasyna tirkelmegen paıdalanýshylarǵa jiberilip jatyr. «EGov Mobile» mobıldi qosymshasy ártúrli jaǵdaıda jeke SMS jáne push-habarlamalar jiberedi. Kórsetilgen siltemege ótip, «eGov mobile» mobıldi qosymshasyn ornatýǵa bolady», - delingen habarlamada.
40 gradýs qyryp barady
Taılandta aptap ystyqtan 30 adam qaıtys bolǵan. dy. Bul eldegi termometr baǵany sáýir aıynyń basynan beri 40 gradýstan tómen túspegen. Sınoptıkterdiń boljamynsha, eldiń ortalyq jáne soltústik oblystarynda joǵary temperatýra osy aptanyń sońyna deıin saqtalady. Turǵyndar men týrıserge ashyq aýada uzaq bolmaýǵa keńes beriledi. Ystyqtan eń kóp zardap shegetinder – dalada jumys isteıtinder men baspanasyz adamdar.