Almaty zooparki qoǵamda alańdaýshylyq týdyrǵan máselelerge qatysty árdaıym túsinikteme berýge daıyn.
Búginde zoobaqta Dıana esimdi erekshe ıagýar ómir súrýde. Onyń taǵdyry ońaı bolǵan joq. 2007 jyly áli kúshikteı kezinde eresek atalyq — óz ákesinen qatty jaraqat alyp, bir aıaǵynan jáne quıryǵynan aıyrylǵan.
Zoologıa men veterınarıa standarttary boıynsha mundaı aýyr jaraqat alǵan janýarlarǵa evtanazıa (uıyqtatyp jiberý) usynylady. Alaıda, Almaty zoobaǵynyń veterınarlyq qyzmeti erekshe sheshim qabyldap, onyń ómirin saqtap qalýdy jón sanady. 2007 jyly mamandar Dıanany qutqaryp, ony aıalap aman alyp qaldy. Olar úshin árbir tirshilik ıesi, qandaı da bir kemistigi bolsa da, qamqorlyqqa jáne laıyqty ómirge quqyly.
Kóp jyl boıy Dıana kelýshilerge kórinbeıtin, jabyq volerde ustaǵan. Alaıda ýaqyt óte kele, onyń densaýlyǵy turaqtanyp, jaǵdaıy jaqsarǵan soń, zoobaq ákimshiligi men mamandar ony ashyq volerge shyǵaryp, kelýshilerge kórsetý týraly sheshim qabyldady. Bul – ereksheligi bar janýarlarǵa degen meıirimdi jáne yqtıatty qarym-qatynastyń sımvoly.
Qazir Dıana – 18 jasta. Bul ıagýar úshin asa qurmetti jas sanalady. Ol únemi veterınarlyq baqylaýda, arnaıy kútim men beıimdelgen tamaqtaný alyp turady. Onyń júrisindegi erekshelik – aýrýdyń belgisi emes, ómir jolynyń bir bóligi. Bul – biz ashyq aıtyp júrgen shynaıy tarıh.