Qazaqstanda keıíngí jyldary ekstrakorporaldyq ūryqtandyru (EKO) jáne reproduktıvtí medıtsınaǵa júgínetín jūptardyń sany kúrt óstí. Būl salada myńdaǵan otbasyǵa úmít syılap kele jatqan mamandardyń bírí - reproduktolog Amangeldí Erkenūly. Ol 12 jyldan berí kóp ata-ananyń quanyshyna sebepshí bolyp júr. Aqshamnews.kz tílshísí mamanmen sūhbattasyp, EKO salasyndaǵy mańyzdy jaıttardy, erler men áıelder densaulyǵy turaly túıtkílderdí talqylady. Materıaldan oqyńyz.
Amangeldí Erkenūly - búgínde Almaty qalasyndaǵy NGC Clinic ortalyǵynda qyzmet atqaratyn tájírıbelí reproduktolog. 12 jyl íshínde ol jáne onyń komandasy myńnan astam otbasyna sábı súyu baqytyna jol ashqan. Onyń aıtuynsha, būryn adamdar bedeulík máselesín jyldap kótermeı júre beretín. Qazír jaǵdaı ózgerdí:
"Búgíngí jūrt kózí ashyq, medıtsına múmkíndíkterínen habardar. Sondyqtan nátıje bolmasa, 2–3 jylda bírden mamanǵa keledí", - deıdí dáríger.
Ortalyq jylyna shamamen 1500–2000 jūpty qabyldaıdy. Olar bala súyuge qatysty keńes alyp, medıtsınalyq tekseruden ótedí. Būl - qoǵamda reproduktıvtí densaulyqqa degen sūranystyń artqanyn kórsetedí.
"Bedeulík - tek áıeldíń emes, erdíń de máselesí"
Qoǵamda kóp jaǵdaıda bala kótere almau máselesí áıel adamnyń moınyna artyla salady. Alaıda dáríger būl túsíníktí joqqa shyǵarady. Onyń aıtuynsha, ís júzínde bedeulík er men áıelge teń dárejede tán - 50/50. Yaǵnı, bírjaqty kíná artudyń esh negízí joq.
"Er adamdar óz densaulyǵyna salǵyrt qaraıdy. Suyqta júredí, beıbereket jynystyq qatynasqa túsedí, uaqytynda dárígerge qaralmaıdy. Dení sau ūrpaq dúnıege kelsín desek, er azamattar jylyna bír ret tekseruden ótudí ádetke aınaldyruy kerek", — deıdí Amangeldí Erkenūly.
Qoǵamdyq stereotıpter: namys pen ūyattyń kóleńkesínde qalǵan jauapkershílík
Amangeldí myrza qazaq qoǵamynda er adamdardyń medıtsınalyq tekseruden ótuí sırek kezdesetínín jasyrmady. Olar mūny namysqa balaıdy.
"Patrıarhaldy túsíník boıynsha, jauapkershílík áıelde dep esepteıdí. Bíraq būl - qate. Bíz būl kózqarasty ózgertuímíz kerek. Óıtkení balanyń dúnıege keluí - ákeníń de, ananyń da ortaq jauapkershílígí", - deıdí maman.
Onyń aıtuynsha, erler arasynda bedeulíkke qatysty dūrys túsíník qalyptaspaǵan.
"Qazaq jígítterínde jasyratyny joq kókírek bar. Oǵan orta da áser etedí. Erler arasynda aıtylatyn syn da ózara namystanuǵa, qate túsíníkpen júre beruge ákelíp soǵady. Mūndaıda qoǵamnyń kózqarasyn ózgertu mańyzdy", - dep tolyqtyrdy ol.
Reproduktıvtí medıtsınanyń kópke beımálím múmkíndíkterí
Medıtsına jetístíkterí búgínde ūryq pen analyq jasushany (ootsıt) bírneshe jyl boıy saqtap qoyuǵa múmkíndík beredí. Mamannyń aıtuynsha būl múmkíndíkterdí bízdíń elde de jıí paıdalanady.
"Bízdíń tájírıbede ómírden ótken adamnyń ūryǵyn paıdalanyp, keıín bala súıgen jaǵdaılar da kezdesken. Būl - ǵylym men tehnologıyanyń jańalyǵy. Sondaı-aq, qazírgí tańda mansabyn bírínshí orynǵa qoıǵan kóptegen áıel óz ootsıtterín qatyryp qoyady. Áıelder óz bolashaǵyn aldyn ala josparlaıdy, karerasyn qalyptastyryp, belgílí bír jasta ana boluǵa sheshím qabyldaıdy. Ózíníń jas kezdegí belsendílígín eskeríp, ūryǵyn saqtap, keıín ana atanǵan áıel de boldy", - deıdí Amangeldí Erkenūly.
Qazaqstanda būl sala qalaı damyp jatyr?
Amangeldí Erkenūly reproduktıvtí medıtsınanyń Qazaqstanda bírtíndep damyp kele jatqanyn aıtty. Mamandar kóbíne shetelde bílím alyp, jańa tehnologıyalardy meńgeríp jatyr. EKO qyzmetterí jalpy álemde qymbat bolǵanymen, sūranys joǵary.
"Bízdíń memlekette surrogat analyq pen donorlyq ūryq arqyly bala súyu zańmen rūqsat etílgen. Būl - Qazaqstandy kórshí elderden erekshelendíretín faktor. Mysaly, Qytaıda surrogat ana boluǵa tyıym salynsa, Ózbekstanda donorlyq balaly boluǵa shekteu qoıylǵan. Bízde zańnamalyq baza ıkemdírek. Degenmen būl salada da sheshímín kútetín máseleler bar. Ol - uaqyt enshísíndegí jūmys", - dep túıíndedí maman.