Seısenbi kúni Máskeýde ótken rásimde «Dostastyq juldyzdary» memleketaralyq syılyqtary TMD-nyń toǵyz eliniń laýreatyna tabystaldy, dep habarlaıdy almaty-akshamy.kz QazAqparatqa silteme jasap.
«Dostastyq juldyzdary» - TMD-nyń gýmanıtarlyq saladaǵy joǵary jetistikteri úshin beriletin marapat. Onyń ıegerleriniń arasynda MMHQI rektory, Reseı Ǵylym akademıasynyń akademıgi Anatolıı Torkýnov, Reseı-armán ýnıversıtetiniń rektory Armen Darbınán (Armenıa), fızık ǵalymdardyń avtorlyq ujymy: Aleksandr Týzıkov, Sergeı Zolotoı jáne Sergeı Korenáko (Belarýs), Astrofızıka ınstıtýtynyń dırektory Gúlchehra Kohırova (Tájikstan), ulttyq ǵylym akademıalarynyń prezıdentteri Murat Jumataev (Qyrǵyzstan) jáne Ion Tıgınáný (Moldavıa) bar. Sondaı-aq, syılyq ıegerleriniń arasynda Qazaqstan jazýshysy Oljas Súleımenov, Ázirbaıjannyń opera ánshisi Elchın Ázızov jáne Ózbekstannyń estrada-sımfonıalyq orkestriniń jetekshisi Mansur Tashmatov bar.
Shara aralas formatta ótti, rásimge RF Prezıdentiniń arnaıy ókili Shvydkoı, Ázirbaıjan Elshisi Búlbúl oǵly jáne Gýmanıtarlyq yntymaqtastyq memleketaralyq qorynyń atqarýshy dırektory Anatolıı Iksanov qatysty, al laýreattar beınebaılanysqa shyqqan. Syılyqtardyń tabystalý rásimine TMD Jastar sımfonıalyq orkestri arnaıy konserttik baǵdarlamasyn usyndy.
Syılyq laýrettaryna arnaıy dıplom, qurmet belgisi men kýálik tabystalady. Syılyqtyń aqshalaı balamasy 2 mln reseı rýblin quraıdy.