Tabıǵat janashyrlary alańdaýshylyq bildirip otyr
Megapolıstiń ekobelsendileri dabyl qaǵýda. Buǵan ǵaryshtan túsirilgen fotosýretter de dálel. Naýryzbaı aýdanynyń shetindegi qazandyq áýelde qurylysqa qajetti materıal alý úshin qazylǵan. Qaıta qalpyna keltirilmegen shuńqyr qazir qoqys tógetin orynǵa aınalǵan, dep habarlaıdy Almaty-akshamy.kz Qazaqtv.com saıtyna silteme jasap.
«Karer men úılerdiń arasy birneshe metr ǵana. Al talap boıynsha myń metr bolýy tıis. Turǵyndardyń shaǵymy oblysqa jiberiledi, biraq eshqandaı shara qoldanylmaıdy. Sondyqtan máselege QR Ekologıa, geologıa jáne tabıǵı resýrstar mınıstrligi nazar aýdarsa deımiz», - deıdi «Almatyny qorǵaımyz» qoǵamdyq birlestiginiń tóraıymy Saltanat Táshimova.
Qalada turmystyq jáne qurylys qaldyqtary úıilgen birneshe jer bar. Ǵaryshtyq monıtorıń qyzmeti arqyly bir ǵana Medeý aýdanynda 9 zańsyz qoqys alańy anyqtalǵan.
«Qaldyqtardy óńdeımiz dep qazandyq qazyp, qoqys qabyldaıdy. Onyń ishinde tyıym salynǵan organıkalyq qaldyqtar da bar. Munyń bári topyraqty, jerasty sýlaryn lastaıdy. Jerdi paıdalaný quqyǵy da saqtalyp jatqan joq. Ashyq jatqan qoqystyń ıisi aýaǵa tarap, jaqyn jerdegi turǵyndardy ýlaıdy», - deıdi «QazEkologıa» respýblıkalyq ǵylymı-óndiristik ortalyǵy bas dırektorynyń mindetin atqarýshy Mıras Baıseıitov.
Qaldyqtardyń memlekettik kadastryna sáıkes, 2021 jyldyń basynda Qazaqstanda 16,3 mlrd tonna qoqys jınaqtalǵan. Bul kórsetkishke zańsyz tógilgen qoqystar kólemi kirmegen. Mamandar «jańa Ekologıalyq kodeks boıynsha júıeli jumys istelgende ǵana bul másele sheshimin tabady» dep otyr.