Úkimet basshysy ǵylymı zertteýlerdi qoldanýdyń naqty nátıjesin is júzinde kórýimiz kerek degen mindet qoıdy.
Qazaqstan Premer-mınıstri Oljas Bektenov jetekshi ǵylymı-zertteý ınstıtýttary, joǵary oqý oryndary, iri ónerkásiptik óndirister men salalyq mınıstrlikter basshylyǵynyń qatysýymen jańartylǵan quramda Joǵary ǵylymı-tehnıkalyq komısıanyń otyrysyn ótkizdi, dep habarlaıdy aqshamnews.kz.
Úkimet basshysynyń resmı aqparattyq resýrsynyń taratqan aqparatyna saı, Premer-mınıstrge Prezıdenttiń Joldaýynda qoıylǵan mindetterdi júzege asyrý aıasynda ǵalymdar men bıznestiń ózara árekettestigine basymdyq bere otyryp Komısıa jumysyn qaıta formattaý boıynsha qabyldanǵan sharalar týraly baıandaldy.
Komısıa otandyq ǵylymdy ekonomıkanyń naqty sektorymen ıntegrasıalaýǵa baǵyttalǵan buryn berilgen tapsyrmalardy eskere otyryp, 2025-2027 jyldarǵa arnalǵan ǵylymı-tehnıkalyq jumys josparyn usyndy. Komısıanyń qaraýyna ǵylymı-tehnıkalyq tapsyrmalar boıynsha 653 usynys kelip tústi, onyń ishinde ekonomıka úshin basym baǵyttar boıynsha 2025-2027 jyldarǵa arnalǵan 113 ǵylymı-tehnıkalyq tapsyrmany júrgizýge qarajat bólý maquldandy. Olardyń ishinde ekologıa, qorshaǵan orta jáne tabıǵatty utymdy paıdalaný; energıa, ozyq materıaldar jáne kólik; ozyq óndiris, sıfrlyq jáne ǵaryshtyq tehnologıalar; bıologıalyq qaýipsizdik jáne basqa da salalar qamtylǵan.
Sonymen qatar Memleket basshysynyń Aýyl sharýashylyǵy eńbekkerleriniń birinshi forýmynda qoıǵan maqsattarǵa qol jetkizý aıasynda agroónerkásip keshenin turaqty damytý boıynsha ǵylymı-tehnıkalyq jumystar maquldandy. Atap aıtqanda, sút salasynyń ónimdiligin arttyrý, eginshilik pen ósimdik sharýashylyǵy ádisterin jetildirý, sondaı-aq ekologıalyq taza óndiristerdi damytý; negizgi aýyl sharýashylyǵy daqyldarynyń sharýashylyq qundy belgileri men bıologıalyq erekshelikteriniń qalyptasýynyń molekýlalyq-genetıkalyq zańdylyqtaryn zerdeleý boıynsha; baý-baqsha sharýashylyǵyn turaqty damytý tásilderi; veterınarıalyq salaýattylyqty qamtamasyz etý jáne basqa da jumystar.
Atalǵan jobalardy qoldaý bıyl qabyldanǵan «Ǵylym jáne tehnologıalyq saıasat týraly» Zań normalaryna sáıkes granttar, baǵdarlamalyq-nysanaly qarjylandyrý jáne jeke ınvestorlar tartý arqyly júzege asyrylady.
Otyrys barysynda «Qazaqmys» korporasıasy, ERG, «Qazatomónerkásip» UAK, KAZ Minerals kompanıalarynyń birlesken jumysynyń nátıjeleri usynyldy.
«Búgingi tańda taý-ken metalýrgıa salasynyń alpaýyt kásiporyndarymen iri 6 hakaton ótkizildi. 30-ǵa jýyq ǵylymı-zertteý ınstıtýty men joǵary oqý oryndarynan 200-deı ǵalym qatysty. Nátıjesinde, shamamen 80 ǵylymı-tehnıkalyq tapsyrma tujyrymdaldy. Komısıa otyrysyna naqty 11 jobany shyǵaramyz. Osylaısha, bıyl jalpy ǵylymı-tehnıkalyq tapsyrmalardyń 10%-y iri kásiporyndarmen naqty jumys nátıjesine negizdelgen. Prezıdent janyndaǵy jańartylǵan Ulttyq Ǵylym akademıasynyń jumysqa qosylýy óte mańyzdy. Ǵylymı-tehnıkalyq tapsyrmany taldaý men saraptaýdy Ǵylym akademıasy da júrgizedi. Bul tapsyrmalardyń barlyǵy da óte qatań irikteýden ótti», — dep málimdedi Saıasat Nurbek.
Sol sıaqty «Samuryq-Qazyna» AQ portfeldik kompanıalarymen jumystar júrgizilýde.
«Qazaqmys» 4 jobany: kenish sýlaryn óndiriste, aýyl sharýashylyǵynda paıdalaný maqsatynda tazartý; metalýrgıa qojdaryn óńdeýdiń ınovasıalyq jáne ekologıalyq qaýipsiz ádisterin ázirleý; mys kenderinen bos altyn men quramynda altyn bar mıneraldar óndirýdi arttyrý; JI tehnologıalaryn paıdalana otyryp, kendi baıytý úderisin avtomattandyrý jáne ońtaılandyrý jobalaryn qarjylandyrady.
«Qazatomónerkásip» UAK» AQ birlesip iske asyrý úshin: ýrandy alý jáne jerasty uńǵymalaryn shaımalaý tıimdiligin arttyrýdyń ekologıalyq turaqty ádisterin ázirleý boıynsha 2 joba irikteldi.
ERG 5 ǵylymı-tehnıkalyq mindetterdi iske asyrýdy qarjylandyrýǵa daıyn, olardyń ishinde skandııdi jáne tereń jatqan boksıt kenderinen basqa da qundy komponentterdi tıimdi alý úshin tehnologıalar keshenin ázirleý jáne synaý; qazbalardy óńdeýdiń ınovasıalyq jáne ekologıalyq qaýipsiz ádisteri; óndirý kezeńinde boksıtterdiń ylǵaldylyǵyn tómendetýdiń yńǵaıly ári ekonomıkalyq tıimdi tehnologıalaryn ázirleý; boksıt kenderiniń artyq ylǵaldylyǵy problemalaryn sheshý úshin ylǵal saqtaıtyn materıaldardy ázirleý kender jáne olardy joǵary ylǵaldylyq jaǵdaıynda tasymaldaý.
Premer-mınıstr atalǵan jobalardyń elimizdiń ónerkásiptik áleýetin kúsheıtý úshin mańyzyn atap ótip, JǴTK jumysynyń birqatar basym baǵyttaryna toqtaldy.
«Memleket basshysy qoldanbaly ǵylymdy damytýdyń jáne joǵary oqý oryndarynyń ekonomıkanyń naqty sektorymen tyǵyz jumys isteýiniń mańyzdylyǵyn birneshe ret atap kórsetti. Biz praktıkalyq máselelerdi sheship, salalardyń ónimdiligin jáne ekonomıkanyń tıimdiligin arttyratyn naqty sheshimderdi usynýymyz kerek. Bul jumys isteýimiz qajet negizgi baǵyttar. İri kásiporyndardyń negizgi jobalaryna baılanystyra otyryp, shaǵyn jáne orta bıznestiń ǵylymı-ınnovasıalyq qyzmetin qoldaý qajet. Birqatar iri kásiporyndar osyndaı yntymaqtastyq túrine qyzyǵýshylyq tanytyp, Ǵylym mınıstrligimen birlese otyryp, ǵylymı-tehnıkalyq tapsyrmalardy ázirleý boıynsha sapaly jumys júrgizdi. Biz ǵylymı zertteýlerdi qoldanýdyń praktıkalyq nátıjelerin kórýimiz kerek», — dep atap ótti Oljas Bektenov.
«Ortalyq-óńir-kásiporyn» júıesinde ǵylymı-tehnologıalyq saıasatty retteý tetikterin ázirleý, óńirlerdi damytý josparlarynda ǵylym boıynsha tıisti ındıkatordy kózdeý tapsyryldy. Bul óńirlerdiń ekonomıkasyn damytýǵa jańa serpin beredi. Úkimet basshysy bıznes ókilderiniń sheteldik ınstıtýttardy tarta otyryp iske asyrylyp jatqan jobalar aıasynda qazaqstandyq ǵalymdarmen ózara is-qımyldy keńeıtýge nazar aýdardy. Tájirıbe almasý otandyq ǵylym salasyn odan ári damytý úshin mańyzdy.
Tıisti mınıstrlikterge iri bıznespen birlesip salalyq ǵylymı-tehnologıalyq keńesterde qoldanbaly ǵylymdy damytý úshin tehnologıalyq mindetterdi aıqyndaý tapsyryldy. Ulttyq ekonomıka, qarjy, ǵylym mınıstrlikteri men Strategıalyq josparlaý agenttigi – ǵylymı mazmuny bar ónim shyǵarýdyń óńirlik kórsetkishteriniń ındıkatorlaryn ázirleýi qajet. Ǵylym mınıstrligi «Atameken» UKP-men birlesip – ǵylym men bıznestiń ózara is-qımylynyń jańa tetikterin engizý jónindegi jumysty kúsheıtýi tıis.