Qazaqstan Respýblıkasynyń Premer-mınıstri Oljas Bektenov Almatyda ótken Eýrazıalyq úkimetaralyq keńes (EÚAK) otyrysynda Eýrazıalyq ekonomıkalyq odaq (EAEO) elderi úkimetteriniń basshylarymen ózara yntymaqtastyqty nyǵaıtý máselelerin talqylady. Jıynda kedergisiz saýda, qolaıly bıznes-orta qalyptastyrý jáne týrızmdi damytý máseleleri qaraldy, dep habarlaıdy aqshamnews.kz
Otyrysqa EAEO elderiniń joǵary laýazymdy ókilderi, onyń ishinde Belarýs, Qyrǵyzstan, Reseı, Armenıa, Iran, Ózbekstan jáne Ázerbaıjan úkimet basshylary, sondaı-aq Eýrazıalyq ekonomıkalyq komısıanyń (EEK) tóraǵasy Baqytjan Saǵyntaev qatysty.Oljas Bektenov óz sózinde EAEO aıasyndaǵy saýda qatynastary men ekonomıkalyq ıntegrasıanyń mańyzdylyǵyna toqtaldy.
«Qazaqstan Prezıdenti Qasym-Jomart Toqaev Eýrazıalyq ekonomıkalyq odaqtyń ekonomıkalyq ıntegrasıa jáne ózara saýdany damytý alańy retindegi tıimdiligin atap ótti. Búginde syrtqy ózgeristerge ıkemdi beıimdelý múmkindigi – ekonomıkalyq básekege qabilettiliktiń basty faktory», – dedi QR Premer-mınıstri.
Qazaqstan tarapy saýda qatynastaryndaǵy kedergilerdi joıý jáne retteýshi ortadaǵy kemshilikterdi joıýǵa basymdyq berdi. Sonymen qatar, EAEO elderi arasyndaǵy bıznesti damytý úshin halyqaralyq sharttarǵa naqty áserdi baǵalaý mehanızmin keńeıtý usynyldy.
Jıynda EAEO elderi arasyndaǵy týrızmdi damytý máselesi de kóterildi. Odaq elderindegi tanymal týrısik baǵyttar men kórikti jerler týraly biryńǵaı aqparattyq platforma qurý bastamasy usynyldy.
Otyrys sońynda EAEO elderiniń ekonomıkalyq áleýetin nyǵaıtýǵa, kásipkerlik ahýaldy jaqsartýǵa jáne birlesken jobalardy júzege asyrýǵa baǵyttalǵan birqatar mańyzdy qujattarǵa qol qoıyldy.