Seriktestik aıasynda áıgili qazaqstandyq shokoladtyń shekteýli partıasy shyǵaryldy.
Parıjdegi Olımpıada oıyndarynyń qarsańynda Qazaqstan Ulttyq Olımpıadalyq komıteti men otandyq «Baıan Sulý» kondıterlik fabrıkasy quramaǵa qoldaý kórsetý maqsatynda kollaborasıa jasady, dep habarlaıdy Almaty-akshamy.kz
Kondıterlik ónimniń qaptamasy Parıjdegi Olımpıada oıyndaryna arnaıy daıyndalǵan sport taqyrybyndaǵy ózindik dızaınmen árlengen.
«Biz úshin sportshylarymyzdy barlyq iri jarysta qoldaýdan bólek, elimizdiń mádenıeti men qonaqjaılylyǵyn álemge dáripteý de mańyzdy. Atletterimiz jarysta únemi ózimen alyp júretin dástúrli syılyq - qazaqstandyq shokolad Olımpıada qarsańynda arnaıy jańa qaptamaǵa oraldy. Bizdiń «Baıan Sulý» kondıterlik fabrıkasymen birlese jasaǵan bul kollaborasıamyz ulttyq brendimizdi halyqaralyq alańda tanytyp qana qoımaı, ózge eldermen dostyq qarym-qatynasty nyǵaıtaryna da senimdimin. Óıtkeni, Olımpıada oıyndary eń aldymen bar álemdi biriktiretin alań», - dedi Qazaqstan UOK bas hatshysy Janar Ýtesheva.
«Olımpıadalyq» shokoladtyń arnaıy partıasy el quramasymen birge Parıjge attanady. Sporttyq delegasıa ókilderi shokoladty ózge el qatysýshylarymen bólisý arqyly olarǵa áıgili qazaq qonaqjaılylyǵynyń bir bóligin kórsetpek.
«Baıan Sulý» kondıterlik fabrıkasy ulttyq óndirýshi retinde sport, salaýatty ómir salty, otbasy ınstıtýty, otbasylyq qundylyqtar men ózin-ózi jetildirý jáne rýhanı damýdy qoldaıdy.
Al olımpıadalyq dızaındaǵy shokoladtardyń shekteýli serıasyn daıyndaý arqyly Qazaqstan UOK-pen birge júzege asqan bul kollaborasıa qoldaýymyzdyń organıkalyq kórinisine aınaldy.
«Baıan Sulý» kondıterlik fabrıkasy shyǵarǵan shekteýli olımpıadalyq koleksıa Parıjdegi jazǵy Olımpıada oıyndaryna qatysatyn bizdiń sportshylarymyzdy qoldaý sımvoly bolmaq», - deıdi «Baıan Sulý» AQ basqarma basshysy ári prezıdenti Tımýr Sadyqov.