Islam Baıramýkov, erkin kúresten Sıdneı olımpıadasynyń kúmis júldegeri:
Bir nárseni túsiný kerek. Baıaǵyda boks qandaı edi? Qazir qandaı jaǵdaıǵa ushyrady? Búginde Halyqaralyq olımpıada komıteti (HOK) Halyqaralyq boks federasıasyn shettetip tastap, ózderi ótkizip jatyr. Oǵan federasıa múshelerin jibermeıdi. Sondyqtan Tokıony da, endi Parıj olımpıadasyn da ózderi qolyna aldy. Eshqandaı daý-damaı, óreskel dúnıelerdi estip te, kórip te jatqam joq. Óıtkeni, jeke kózqarasym boıynsha bárin taza ótkizip jatqan sıaqty.
Árıne, kemshilikter joq emes. Degenmen, HOK uıymdastyrǵan ekinshi olımpıadadan asyp bara jatqan qatelik kórmedim. Tóreshiler jumysyn shynaıy, ádil atqaryp otyr. Jankúıerler de boksshylardyń kóbi olımpıada chempıony bolyp oralǵanǵa úırenip qalǵan. Shyn máninde, osy olımpıadadan keıin boks salasynyń mamandarynan kádimgi zerttelgen taldaý kútý kerek.
Qazir búkil álem damyp jatyr. Bálkim, boksshylardyń daıyndyq jumysyn, jattyǵý taktıkasyn, federasıanyń retteý jarysyn basqasha qarastyrý kerek shyǵar. Kelesi olımpıadada osyndaı qatelikter bolmas úshin qazirden bastap komısıa quryp, bárin zerttep, aýystyratyn adamdardy aýystyryp, qoıatyn adamdy qoıyp, jańasha baǵdarlama jasap, durys baǵytta jumys isteý kerek. Táýelsiz mamandardyń da pikirin tyńdap, sońynan sheshim qabyldaý qajet. Men boks mamandarymen, tóreshilermen pikirlesip otyramyn. Eshqandaı da bura tartý joq. Biraq Muhamedsabyrdyń jekpe-jeginde shamaly kórindi. Bokstyń mamany emespin ǵoı. Osy sporttyń mamandarynan surasam, «teńbe-teń boldy, tóreshiler solaı sheshti» deıdi. Qazaqstannyń Ulttyq olımpıada komıteti shaǵym túsirgenmen «Tóreshiler kemshilik jiberipti» dep, ári ketse tóreshilerin jazalaıdy, biraq jekpe-jektiń nátıjesin ózgertpeıdi. Bul aıdan anyq qoı. Jigitter olımpıadaǵa ne úshin barǵanyn biledi. Maqsat anyq, jospar bar. Bar bolǵany sáti túspedi. Buıyrmaǵan dúnıe dep qana qabyldaý kerek.
"Nege.kz" saıtynan yqshamdalyp alyndy