Sport - óner!
Ulttyq Olımpıada komıtetiniń sporttyq quzǵa órmeleýden Tokıo Olımpıadasynda synǵa túsken Rıshat Haıbýllın 11-shi oryn ıelengen bolatyn. Sportshynyń ákesi ári jattyqtyrýshysy Rınat Haıbýllın ulynyń alǵashqy Olımpıadadaǵy kórsetkishin qorytyndylady, dep habarlaıdy Almaty-akshamy.kz.
«Negizi, biz «jyldamdyq» boıynsha 1-2 oryn ıelenýdi kózdedik. Rıshattyń buǵan áleýeti jetetin edi. Al fınalda 5-7 oryn aralyǵyna enýdi maqsat ettik. Alaıda, jyldamdyqtan soń tórtinshi orynda qaldyq ta, qorytyndy esepte 11-shi orynǵa syrǵydyq.
Qalaı bolsa da, nátıje kóńilimizden shyǵady. Rıshat atalǵan sport túrinen alǵash ret Olımpıadaǵa qatysyp, ózin jaqsy qyrynan kórsetti. Ol Germanıa, Reseı, Qytaı, Italıa, Kanada jáne Japonıanyń myqty degen atletterin artta qaldyrdy. Mundaı jarystaǵy tájirıbe ómir boıyna qajet ekeni anyq. Sportshy retinde de, bapker retinde de ólsheýsiz tájirıbe aldyq.
Sportshy retindegi Rıshattyń artyqshylyǵy – jarys aldynda tas-túıin daıyn bolýy jáne qateliksiz óner kórsetýi. Al kemshin tusy retinde tájirıbeniń azdyǵy men halyqaralyq jarystarǵa kóp qatyspaǵanyn aıtamyn. Qarsylastarynyń tájirıbesi on jyldan asyp ketedi, al Rıshat álemdik arenada eki jyldan beri kózge túsip júr», - deıdi Haıbýllın.