Olımpıada kúnine arnalǵan el aımaqtary arasyndaǵy estafeta 23 maýsym kúni elordadaǵy Trıatlon saıabaǵynda aıaqtalady.
Almatyda Olımpıada baǵdarlamasyndaǵy eń jas sport túrleriniń biri – sporttyq quzǵa órmeleýden týrnır ótti, dep habarlaıdy Almaty-akshamy.kz QR Ulttyq olımpıada komıtetiniń saıtyna silteme jasap.
Qazaqstandyqtar Halyqaralyq olımpıada kúnin toılaýdy odan ári jalǵastyrýda. Jeńil atletıka jarystary men elimizdiń soltústiginde ótken velododadan soń estafetany ońtústik óńir qabyl aldy. «Bárimiz birge: jyldam, bıikke, myqty» urany arqyly sportshylar búkil elmen yntymaqtastyqta ekenin bildirýde. Almatyda Olımpıada baǵdarlamasyndaǵy eń jas sport túrleriniń biri – sporttyq quzǵa órmeleýden týrnır ótti.
Tokıo Olımpıadasynda sporttyq quzǵa órmeleýshiler alǵash ret baq synaıdy. Olardyń qatarynda qazaqstandyq Rıshat Haıbýllın de bar. Almaty týmasy 2019 jylǵy álem birinshiliginde júlde men joldama jeńip alǵan bolatyn.
«Sporttyq quzǵa órmeleý óte jas sport túri sanalady. Soǵan qaramastan, ony damytýǵa múmkindigimiz bar. Tabıǵı jáne jasandy quzdardy elimizdiń ár aımaǵynan tabýǵa bolady. Tokıoda el namysyn qorǵaıtyn atletimiz de bar. Rıshat Haıbýllınge Olımpıada oıyndarynda sáttilik tileımiz.
Pandemıa olımpıadalyq týrnırlerdiń jarys kestesine biraz ózgeris engizdi. Kóptegen irikteý jarystary ótpeı qaldy. Halyqaralyq Olımpıada komıteti oıyn kestesin azaıtqandyqtan, Tokıodaǵy sportshylar sany Rıo Olımpıadasynan eki myńǵa kem bolmaq.
Degenmen, sporttyq quzǵa órmeleý, karate sekildi jańa baǵdarlamalar bizdiń alǵa basyp, bıikterden kórinýimizge sebep bolary sózsiz», - deıdi Elsıar Qanaǵatov.
Jas sportshylar 2024 jylǵy Parıj Olımpıadasyna baq synaýda kózdep, ulttyq quramaǵa qabyldaný úshin bar kúshin salmaq.
«Qazaqstanda sporttyń bul túrin damytýǵa úlken múmkindikter berilgen. Sondyqtan, bizge Rıshat salǵan dańǵyldy odan ári jalǵastyryp, bıikke umtyla berý kerek. Jastardyń talaby úlken ekeni qýantady. Eń bastysy - atalǵan sport túri jastar arasynda keńinen tanylýda. Bolashaqqa senimmen qaraımyz. Velosport nemese jeńil atletıka syndy buqaralyq sport túrine aınalatynymyz da anyq», - deıdi sporttyq quzǵa órmeleýden QR jastar quramasynyń aǵa jattyqtyrýshysy Aleksandr Nıgmatýlın.
Jasóspirimder arasyndaǵy el chempıonatynyń júldegerleri «boýlderıng» pen «qıyndyq» boıynsha synǵa tústi. Eki balalar toby «jyldamdyq» boıynsha jarysqanyn da aıta ketý kerek.
Matveı Esıpov, «jyldamdyq» boıynsha 2021 jylǵy QR chempıonatynyń júldegeri:
«Bul óte qyzyqty sport túri. Túrli emosıa syılaıdy. Árıne, bapkerdiń jetekshiligimen, qaýipsizdik sharalaryn saqtaý arqyly shuǵyldaný kerek. Sondyqtan, sport mektepteri men úıirmelerine kelip úırenińizder, jarysyp kórińizder. Bul óte keremet sezim».
Olımpıada kúnin toılaý 21 maýsym kúni Aqtaýda jalǵasady. Atalǵan qalada boks pen dzúdodan sheberlik sabaqtary ótedi. Olımpıada kúnine arnalǵan el aımaqtary arasyndaǵy estafeta 23 maýsym kúni elordadaǵy Trıatlon saıabaǵynda aıaqtalady. Bul kúni kóshe sport túrlerinen merekelik shara ótedi. Bul is-sharany «Qazsport» arnasynyń tikeleı efırinen tamashalaı alasyzdar.