Amerıkalyq ánshi Djennıfer Lopes Almatyda ótken konsertindegi qyzyq oqıǵaǵa pikir bildirdi, - dep habarlaıdy aqshamnews.kz tilshisi.
10 tamyzda sahnada án aıtyp turǵanda onyń moınyna shegirtke qonǵan edi.
Djennıfer bul týraly The Tonight Show Starring Jimmy Fallon baǵdarlamasynda aıtty. Óner ıesi sol kezde alǵashynda ne bolǵanyn ózi de túsinbeı qalǵanyn moıyndady.
"Birnárse sezdim, biraq shamdardyń jaryǵynan ushyp júrgen jándik shyǵar dep oıladym. Al keıin, joq, denemde birnárse órmelep bara jatqanyn baıqadym!" - dedi ánshi kúlip.
Baǵdarlamadaǵy kórermender de kúlkige qaryq boldy, al Djeı Lo shegirtkeniń qalaı "qonǵanyn" sahnada kórsetip berdi. Ol ózin ustap, sabyr saqtaýǵa tyrysqanyn da aıtty.
"Ol meni qydyqtap jatty. İshteı: "Jaraıdy, ándi bitirip alaıyn", - dep oıladym. Al silkip jibergennen keıin jaryqta ne eken dep qarasam, tikushaqtaı úlken shegirtke eken!" - dep ázildedi Lopes.
Bul oqıǵa jelide memge aınaldy. Qoldanýshylar "dúnıedegi eń baqytty shegirtke", "ony 500 dollarǵa aýksıonǵa qoıý kerek" dep qaljyńdady. Al keıbireýler Lopestiń kásibıligine tańdanysyn bildirdi.
"Men onyń ornynda bolsam, aıqaılap sahnadan qashyp keter edim. Al ol ánin toqtatpady!" - dep jazdy jeli qoldanýshylary.
Djennıfer mundaı tosyn jaǵdaılar konsertte jıi bolatynyn aıtty.
"Sahnada ne bolaryn bilmeısiń. Biraq eń bastysy - bárin aıaǵyna deıin jetkizip, kórermenge shoý syılaý", - dedi ol.
Aıta keteıik, 10 tamyzda Almatynyń Ortalyq stadıonynda Djennıfer Lopestiń Qazaqstan tarıhyndaǵy alǵashqy konserti ótti.