Sholpan City tūrǵyn úı keshenínde múlík ıelerí bírlestígíníń (OSI) zańdy tóraǵasynyń ókílettígí qalpyna keltíríldí. Būl sheshím tūrǵyndardyń qalalyq ákímdíkke júgínuínen keıín qabyldanǵan. Almaty ákímí Darhan Satybaldynyń tapsyrmasymen keshenníń jaǵdaıyna tekseru júrgízílíp, sarapshylar basshylyqty qaıta saılaudyń zańdylyǵyn rastady.
Bes jyl būryn paıdalanuǵa berílgen Sholpan City tūrǵyn úı keshení osy uaqyt aralyǵynda bírqatar ūıymdastyrushylyq jáne paıdalanu máseleleríne tap bolǵan. Tūrǵyndar jerasty avtotūraǵynyń maqsatsyz paıdalanyluy, dauly nysandar jáne múlík ıelerí bírlestígí íshíndegí kelíspeushílíkter turaly habarlaǵan.
«Keıbír tūrǵyndar típtí avtotūraqta bólme jasap alǵan – kír juady, tamaq písíredí, sol jerde tūrady. Mūny qalypty jaǵdaı deuge kelmeıdí», – dedí keshen tūrǵyny Raushan Ábílova.
Qıyndyqtar būrynǵy MIB tóraǵasynyń ókílettíktí tapsyru rásímín saqtamauynan da tuyndaǵan.
«19 qyrkúıekte eks-tóraǵa Aıman Izatova eGov.kz portalynda óz-ózín qaıtadan MIB ókílí etíp taǵaıyndaǵan. Alaıda tūrǵyndarǵa da, memlekettík organdarǵa da qaıta tírkeu qūjattaryn kórsetken joq», – dedí saılanǵan tóraıym Araılym Almaǵambetova.
Qalalyq qyzmetterdíń aralasuynan keıín jaǵdaı retteldí. Tūrǵyndar qala ákímíne kórsetken nazar men qoldauy úshín alǵys bíldírdí.
«Darhan Amangeldíūlyna bízdí tyńdap, máselení sheshkení úshín rızashylyǵymyzdy bíldíremíz. Onyń aralasuymen túıtkíl sheshílíp, endí basqa baǵyttar boıynsha da jūmys bastalatynyna sením bar», – dedí olar.
Qazírgí tańda jerdí paıdalanu, kommunaldyq tólemder men aumaqty kútíp-ūstauǵa qatysty máselelerdí retteu jalǵasyp jatyr. Barlyq protsess qala basshylyǵynyń baqylauynda.