«Oımasha» oqý-jattyǵý polıgonynda jaýyngerlik atystar ótip jatyr. Sabaqtyń taqyryby bólimshelerdiń kúndiz de, túnde de negizgi urys túrlerinen oqý-jaýyngerlik mindetterdi oryndaýyn kózdeıdi, dep habarlaıdy almaty-akshamy.kz
Atalǵan sharaǵa myńnan astam áskerı qyzmetshi qatysty, 20-dan asa áskerı tehnıka, onyń ishinde tankter, brondy transporterler men artılerıalyq qarýlar jumyldyryldy.
Polıgonda naqty urys kórinisin jasaý úshin brondy mashınalardy, atys núktelerin jáne qarsylastyń tiri kúshin ımıtasıalaıtyn nysandar qoldanyldy. Shartty qarsylastyń nysandary men qarý-jaraqtary túrli oq-dárilermen joıyldy. Teńiz jaıaý áskerleriniń bólimsheleri qarsylaspen betpe-bet kelip, qorǵanysta, shabýylda jáne kúndizgi-túngi urys is-qımyldaryn pysyqtady.
Artılerıalyq bólimshelerdiń ekıpajdary men jaýyngerlik eseptoptary atys pozısıalaryn óristetý jáne ornalastyrý, ınjenerlik jabdyqtar jáne olardy búrkemeleý, nysanalardy barlaý jáne oq atýdy basqarý jónindegi normatıvterdi oryndaý kiretin joryq is-qımyldaryn pysyqtady.
Polıgonda komandırlerden táýelsiz sheshimder qabyldaýdy jáne senip tapsyrylǵan bólimshelerge sheber basshylyq jasaýdy talap etetin jaǵdaı jasaldy.
– Sabaq barysynda teńiz jaıaý áskerleriniń dalalyq mashyǵy men bólimshelerdiń úılesimdiligi jetildiriledi. Jas komandırler urys barysynda jeke quramdy basqarý tájirıbesin úırenedi. Áskerı qyzmetshiler is júzinde urysqa barynsha jaqyndatylǵan jaǵdaılarda áreket ete otyryp, qoıylǵan mindetterdi oryndaý tártibin meńgeredi, – dep atap ótti 2 shabýyldaý batalónynyń komandıri kapıtan Damır Maqsatov.
Jaýyngerlik atys degenimiz - taktıkalyq daıyndyqty oqytýdyń eń joǵary nysany, bólimsheler men kishi toptardyń jaýyngerlik úılesimdiligi men atys jattyǵýlarynyń qorytyndy kezeńi.