Astanada sý tehnologıalary men resýrstary boıynsha I halyqaralyq «Global water» forýmy ótip jatyr.
Sý resýrstary jáne ırrıgasıa mınıstrliginiń qoldaýymen uıymdastyrylǵan is-sharaǵa QR Prezıdentiniń keńesshisi Qanat Bozymbaev, Delivery Unit keńsesiniń sý resýrstary blogynyń basshysy Arman Turlybek, sondaı-aq beıindi memlekettik organdardyń, bıznestiń, ǵylymı jáne qoǵamdyq uıymdardyń ókilderi, Avstrıa, Izraıl, Fınlándıa, Fransıa jáne basqa memleketterdiń sý salasynyń jetekshi sarapshylary qatysty, dep habarlaıdy Almaty-akshamy.kz Cý resýrstary jáne ırrıgasıa mınıstrligine silteme jasap.
Qazaqstan men Ortalyq Azıadaǵy sý resýrstaryn tıimdi paıdalaný men qorǵaý máseleleri talqylanǵan forýmda Sý resýrstary jáne ırrıgasıa mınıstri Nurjan Nurjigitov elimizdegi sý salasyn transformasıalaý baǵyttynda júrgizilip jatqan negizgi jumystar týraly baıandap berdi. Vedomstvo basshysy elimizdegi sý tapshylyǵy problemasyn sheshý úshin eki negizgi qujat - jańa Sý kodeksi jáne Úkimet qabyldaǵan Sý resýrstaryn basqarý júıesin damytýdyń 2030 jylǵa deıingi tujyrymdamasy ázirlengenin atap ótti.
«Jańa Sý kodeksinde sý únemdeý máselesi mańyzdy ról atqarady. Atap aıtqanda, sý resýrstaryn utymdy paıdalanýǵa, sý únemdeý tehnologıalary men sýdy qaıta paıdalaný júıesin qarqyndy engizýge, sondaı-aq jerasty aýyz sýlaryn maqsatsyz paıdalanýǵa jol bermeýge basymdyq berilip otyr. Sý salasyndaǵy buzýshylyq úshin jaýapkershilik zań deńgeıinde qatańdatylady. Sondaı-aq, kodekske aýyz sýdyń sapasyn jaqsartýǵa qoıylatyn talaptar engizildi»,- dedi Nurjan Nurjigitov.
Mınıstr aýyl sharýashylyǵynda sý únemdeý máselesine jeke toqtaldy. Vedomstvo sharýalardy sý únemdeý tehnologıalaryn ornatýǵa yntalandyrý úshin Aýyl sharýashylyǵy mınıstrligimen birlesip sý únemdeý júıelerin ornatý jáne satyp alý shyǵyndaryn sýbsıdıalaý úlesin 50%-dan 80%-ǵa deıin ulǵaıtý boıynsha jumys júrgizip jatyr.
«Memleket basshysynyń tapsyrmalaryn oryndaý úshin Úkimet Sý resýrstaryn basqarý júıesin damytýdyń 2030 jylǵa deıingi tujyrymdamasyn bekitti. Mańyzdy qujat sý qorǵaý qurylystaryn salý jáne rekonstrýksıalaý, gıdrotehnıkalyq qurylystardy, ırrıgasıalyq júıelerdi rekonstrýksıalaý, sý únemdeý tehnologıalaryn sıfrlandyrý jáne engizý jónindegi birqatar shuǵyl sharalardy iske asyrýdy kózdeıdi. Mınıstrlik keshendi jospardyń nátıjesinde el ekonomıkasyn kepildi sýmen qamtamasyz etýge, tótenshe jaǵdaılardyń aldyn alýǵa jáne tasymaldaý kezinde sýdyń ónimsiz shyǵynyn 25%-ǵa deıin azaıtýǵa nıetti»,- dedi Sý resýrstary jáne ırrıgasıa mınıstri Nurjan Nurjigitov.
Nurjan Nurjigitov «Global water» forýmy sý salasyndaǵy máseleler boıynsha tájirıbe, bilim jáne ıdeıa almasý, sondaı-aq túrli múddeli taraptar arasynda seriktestik baılanystar men yntymaqtastyq ornatý úshin biregeı alańǵa aınalatynyna senim bildirdi. Sondaı-aq, mınıstrlik ókilderi forým aıasynda aıtylǵan usynystardy nazarǵa alyp, jumys barysynda mindetti túrde zerdeleıtinin málimdedi.