Oljas Bektenov premer-mınıstr laýazymynda qyzmetke kiriskenine bir juma ótti. 6 aqpanda Memleket basshysy Qasym-Jomart Toqaev ony atqarýshy organnyń basshy etip taǵaıyndaǵan edi. Bir apta az ýaqyt bolǵanymen de, onyń alǵashqy qadamdarynan aq oı túıýge bolady.
Oljas Bektenovtyń basqarý stılin «aqyldy qataldyq» dep sıpattaýǵa bolady. «Jumsaq avtorıtarızm» jáne «lıberaldy» basqarý elementterin ornymen qoldanady.
Kóp sózimen emes, isimen óz jumysyn kórsetýge beıim. Sondyqtan avtorıtarly jabyqtyq baıqalady. Nebári bir jumanyń ishinde Oljas Bektenovtyń basshylyǵymen Úkimette 3 jınalys ótti. 6 aqpanda jańa mınıstrlerdi tanystyrdy. Onda jańa kabmın basshysy:
«Formalızmsyz, búrokratıasyz jáne qajetsiz jıyndarsyz belsendi jumys. Az sóılep, kóp is tyndyrý kerek», - dep málimdeme jasady.
9 aqpanda Úkimettiń keńeıtilgen otyrysynda Memleket basshysy Qasym-Jomart Toqaev bergen tapsyrmalardy iske asyrý máseleleri jóninde keńes ótkizdi. Onda O. Bektenov:
«Jumys qarqyny joǵary, al talap qatań bolady», - dep Úkimet aldyndaǵy negizgi mindetterdi belgilep berdi. As sóılep, kóp is tyndyrý jáne úkimet múshelerinen talaptyń qatań bolatyny «jumsaq avtorıtarly» basqarý stıliniń elementteri.
Búgin jańartylǵan Úkimettiń birinshi otyrysynda bıyl qańtardaǵy áleýmettik-ekonomıkalyq damý qorytyndylary men respýblıkalyq búdjettiń atqarylý máseleleri talqylandy. Bul joly avtorıtarly málimdemeler jasalǵan joq.
Budan bólek «jumsaq avtorıtarızmnen» qatar «lıberaldy» basqarý belgileri kórindi. Jańa kabmın basshysy qolyndaǵy bılikti bólisip otyr. Iaǵnı, kórpeni ózine tartyp jaýapkershilikti óz moınyna alyp jatqan joq. Eń aldymen bıligin orynbasarlarymen bólisýde. Úkimettiń deńgeıinde bir aptada 7 jınalys ótse, onyń 4-eýine orynbasarlary tóraǵalyq etken. Birinshi orynbasar Roman Sklár jáne vıse premer Serik Jumanǵarınniń tóraǵalyǵymen bir-birden jınalys ótse, Tamara Dúısenovanyń basshylyǵymen 2 jınalys ótti.
Bılikti bólisý tek Úkimette ǵana emes, Úkimet pen jergilikti ákimdikter arasynda da ótýde. Mysaly, Almatyda bolǵan qaıǵyly laı kóshkinine baılanysty bolǵan keıste qala ákimdiginiń isine tikeleı aralasqan joq. Eski Úkimet bolǵanda ortalyqtan bir sheneýnik mindetti túrde Almatyǵa keler edi.
Bul qadamdar men sheshimderdiń bári jańa kabmın basshysynyń «aqyldy qataldyq» basqarý stılin qoldanyp jatqanyn kórsetedi. Onyń qandaı nátıje kórsetetini bıylǵy jyl qorytyndysy boıynsha belgili bolmaq. 2029 jylǵa qaraı ekonomıkalyq ósim 450 mlrd dollarǵa jetýi úshin jylda keminde 6% ósim bolýy qajet ekenin eskergen jón.