Almatynyń Perınatologıa jáne balalar kardıohırýrgıasy ortalyǵyna retınaldy kamera ornatyldy
Bul qurylǵy dárigerlerge jańa týǵan nárestelerdiń kóz patologıasyn, sonyń ishinde shala týǵan nárestelerdiń retınopatıasyn der kezinde anyqtaýǵa kómektesedi. Ortalyqta zamanaýı dıagnostıkalyq quraldar «AYALA» qaıyrymdylyq qorynyń «Álemdi kóremin» jobasy jáne Almaty qalasy Qoǵamdyq densaýlyq saqtaý basqarmasymen yntymaqtastyq týraly memorandým aıasynda iske asty.
Qaıyrymdylyq qordyń elimizdegi medısınalyq ortalyqtaryna tartý etken osymen jetinshi retınaldy kamerasy. Bıyl osyndaı dıagnostıkalyq qurylǵylarmen taǵy eki oblystyq Perınataldyq ortalyqty – Aqtóbe men Atyraýdaǵy ortalyqtardy jaraqtandyrýdy josparlap otyr.
FORUS NEO (Úndistan) retınaldy kamerasy oftalmolog-dárigerge reanımasıa jaǵdaıynda jáne jańa týǵan náresteni ÓJJ apparatyna qosqanda da balany dıagnostıkalaýǵa múmkindik beredi. Mundaı múmkindik basqa qurylǵylarda joq.
«AYALA» qaıyrymdylyq qory «Álemdi kóremin» jobasyn úshinshi jyl júzege asyryp keledi. Qor tıimdi qaıyrymdylyq tásilin qoldana otyryp, qazaqstandyq oftalmolog-dárigerlerge Qazaqstannyń 17 perınataldyq jáne ǵylymı ortalyqtarynda 4,5 myńnan astam jańa týǵan nárestelerdi dıagnostıkalaýǵa, olardy 26 birlik dıagnostıkalyq jáne lazerlik jabdyqtarmen qamtamasyz etýge kómektesti.
«Almaty qalasynyń Perınatologıa jáne balalar kardıohırýrgıasy ortalyǵynda jyl saıyn 8,2 myńnan astam náreste dúnıege keledi, onyń ishinde dene salmaǵy óte tómen 800 shaqty sábı bar. Retınaldy kamera bul ortalyqtyń oftalmologtaryna jedel jáne dál dıagnoz qoıýǵa jáne qajetti emdi ýaqytyly usynýǵa kómektesedi, sonyń arqasynda júzdegen bala kórý qabileti boıynsha múgedektikten qutyla alady», – dep atap ótti «AYALA» qaıyrymdylyq qorynyń negizin qalaýshy jáne prezıdenti Aıdan Súleımenova.
Qaıyrymdylyq qor 2021 jyldyń mamyrynan bastap QR Densaýlyq saqtaý mınıstrligimen Memorandýmǵa sáıkes «Álemdi kóremin» jobasyn júzege asyrýda. 2023 jyldyń qazan aıynda qor Almaty qalasy QDSB Perınatologıa jáne balalar kardıohırýrgıasy ortalyǵymen de Yntymaqtastyq týraly memorandýmǵa qol qoıdy. Jobany iske asyrý kezinde Qazaqstanda retınopatıaǵa baılanysty shala týǵan balalardyń kórý qabileti boıynsha múgedektigi 0,6 paıyzǵa deıin tómendedi.
Taqyrypqa oraı
Sabına SMAǴULOVA, Perınatologıa jáne balalar kardıohırýrgıasy ortalyǵynyń oftalmolog-dárigeri:
– Bul kameranyń ereksheligi sol, birneshe sýret túsirip, ata-anasymen, sheteldik áriptestermen bólisemiz. Hırýrgıalyq emdeý ádisin durys tańdaýǵa múmkindik beredi. Proses daıyndyq arqyly ótedi. Balalar óte kishkentaı, ıaǵnı alǵashqy tekserý týylǵannan keıin 21–25 kún ishinde ótedi. Kamera balany tekserýge daıyndaıdy. Naqty ýaqyt rejıminde odan ári dıagnostıkalaý jáne emdeý úshin birqatar sýretter túsiriledi.
Kerek derek
* Shala týǵan nárestelerdiń retınopatıasy – shala týǵan nárestelerdiń kóz torynyń (jaryqqa sezimtal aımaǵynyń) damýynyń buzylýymen baılanysty aýrýy, ol tolyq soqyrlyqqa ákelýi múmkin. Bala merziminen neǵurlym erte týǵan saıyn onda retınopatıanyń kúrdeli túrleriniń paıda bolý yqtımaldyǵy joǵary bolady, óıtkeni kóz torynyń qalyptasýy gestasıanyń 39-40 aptasynda ǵana aıaqtalady. Qazaqstanda jyl saıyn 20 000-nan astam shala týǵan náresteler dúnıege keledi, olardyń 20%-yn dene salmaǵy 500-den 1000 gramǵa deıin óte tómen balalar quraıdy. Shala týǵan balalardyń retınopatıasynda eshqandaı syrtqy belgiler joq. Sondyqtan arnaıy jabdyqtardyń kómegimen mamandandyrylǵan jáne bilikti oftalmolog qana aýrýdyń belgilerin erte anyqtap, balany lazermen hırýrgıalyq túzetýge jibere alady. «AYALA» qaıyrymdylyq qory – Qazaqstandaǵy neonatologıaǵa mamandanǵan jalǵyz qaıyrymdylyq qory.