Kezdesýde Elbasyna «Nur Otan» partıasy Saıası keńesiniń keńeıtilgen otyrysyna daıyndyq barysy týraly aqparat berildi.
«Nur Otan» partıasynyń Tóraǵasy Nursultan Nazarbaev Baýyrjan Baıbekti qabyldady, dep habarlaıdy Almaty-akshamy.kz Elbasy.kz saıtyna silteme jasap.
Kezdesýde Qazaqstannyń Tuńǵysh Prezıdentine «Nur Otan» partıasy Saıası keńesiniń keńeıtilgen otyrysyna daıyndyq barysy týraly aqparat berildi. Baýyrjan Baıbek Elbasyǵa el óńirlerine jasaǵan jumys saparlarynyń qorytyndysy, sondaı-aq «Nur Otan» partıasy máslıhattardaǵy fraksıasynyń saılaýaldy baǵdarlamanyń oryndalýy boıynsha ótkizgen otyrystary nátıjesi jaıly baıandady.
«Osy jyly Úkimet músheleriniń qatysýymen Májilistegi bizdiń fraksıanyń 3 otyrysy ótti. Jumys aldyn-ala bekitilgen josparǵa sáıkes júrgizilýde. Sonymen birge 2025 jylǵa deıingi «Jastar – Otanǵa!» baǵdarlamasy júzege asyrylýda, qazirgi ýaqytta is-sharalardyń 20 paıyzy atqaryldy», – dedi «Nur Otan» partıasy Tóraǵasynyń birinshi orynbasary.
Sondaı-aq Baýyrjan Baıbek jýyrda ótken «Jastar – Otanga!» halyqaralyq forýmynyń nátıjelerin baıandap, 15 memleket ókilderiniń qatysýymen halyqaralyq partıalyq forým uıymdastyrý josparlanyp otyrǵanyn jetkizdi. Sońynda «Nur Otan» partıasynyń Tóraǵasy Ortalyq apparatqa jáne partıanyń óńirlik fılıaldaryna Saıası keńestiń keńeıtilgen otyrysyn ótkizýge daıyndyqty jalǵastyrýdy tapsyrdy.