Búgin partıamyzdyń kezekten tys HHİİ sezi onlaın formatta ótti. Sonymen qatar búgin - partıa kúni. Dál osy kúnge oraılastyrylǵan búgingi jıynnyń partıa tarıhyndaǵy orny óte erekshe boldy.
Partıa Tóraǵasy Qasym-Jomart Toqaevtyń partıany modernızasıalaý boıynsha bergen tapsyrmasy aıasynda daıyndalǵan baǵdarlama talqylandy jáne ony sıez delegattary biraýyzdan maquldady.
Osyǵan oraı Parlament Májilisindegi Nur Otan partıasy fraksıasynyń tóraǵasy Erlan Jaqanuly Qoshanov partıa ataýyn AMANAT dep ózgertý týraly usynys bildirdi. Memleket basshysy bul usynysqa qoldaý bildirdi, partıanyń jańa ataýyn sıez delegattary da biraýyzdan qoldady.
Bul – Jańa Qazaqstandy qurý jolynda jańarǵan partıamyzǵa berilgen aıryqsha jaýapkershilik pen kórsetilgen zor senim dep bilemin.
«AMANAT» – halyq murasyn saqtaýshy partıa. Tamyry tereń tarıhymyz, mádenıetimiz ben ádebıetimiz, tilimiz ben salt-dástúrimiz – Táýelsiz Qazaqstannyń barsha azamattarynyń murasy. Osy murany birtutas eldiń ortaq múddesi úshin amanat retinde kózdiń qarashyǵyndaı saqtap, damýyna jaǵdaı jasaý – partıanyń basty mindetteriniń biri. Amanat saqtalǵan jaǵdaıda qoǵamda adamdar arasyndaǵy baýyrmaldyq, senim men meıirim kúsheıedi, el ishinde yrys-bereke ulǵaıady. Sondyqtan, qadirli aǵaıyn, jańarǵan jańa partıamyz atyna zaty saı bolady dep senemin.