Kásipker bul aqshaǵa Almatydan erekshe mýzeı ashpaq.
Alǵashqy kirpishi 2022 jyly qalanǵan mýzeı 2024 jyldyń kúzinde ashylady dep josparlanyp otyr.
Elimizdegi MEGA oıyn-saýyq ortalyqtarynyń ıesi Nurlan Smaǵulovtyń kezekti jobasy Almaty Museum of Arts dep atalatyn zamanaýı óner mýzeıi ǵımaratynyń jartysynan kóbi salynyp bitken.
«Bul murajaı qalanyń damýyna serpin berip, bolmysymyzdyń ózgerýine áser etedi. Murajaı kez kelgen álemdik galereıalardyń barlyq standarttaryna saı bolady. Eń tanymal avtorlardyń shyǵarmalaryn kórýge qansha qonaq keletinin oılaı berińiz. Adam izinde ólmes dúnıeler qaldyrý úshin bar kúsh-jigerin salý kerek. Buǵan deıin men saldyrǵan saýda ortalyqtary, avtoortalyqtar, tipti zaýyttar da tez buzylady, biraq biz myna murajaıdyń qasbetiniń ózin júzdegen jyldar boıy myzǵymaıtyndaı etip tańdap jatyrmyz. Eshqaısymyz bul dúnıede qalmasaq ta, murajaı ornynda tura bermek», - dedi kásipker.
Kásipkerdiń aıtýynsha, mýzeıge satyp alynǵan eksponattardy qosqanda, jalpy búdjet 100 mln dollarǵa teń. Mýzeı salynatyn jerdiń sharshy metriniń quny 3000 dollardan. Qarajattyń 40 paıyzy ǵımarat qurylysyna jumsalady. Qazaqstandyq kásipkerlerdiń kóbi bul jobaǵa qyzyǵýshylyq tanytyp, ınvestor bolǵysy kelgenimen, Smaǵulov eshkimnen kómek almaıtynyn aıtty. Almaty qalasynyń joǵarǵy jaǵynda oryn tepken bul mýzeı Almaty Theatre ǵımaratymen kórshiles.
Mýzeı ornalasqan 2 gektarǵa jýyq jerdi qalalyq ákimshilik 50 jylǵa paıdalanýǵa bergen. Sonymen qatar jergilikti bılik syrttan ákelinetin óner týyndylaryna qosymsha qun salyǵyn esepteýge de tyıym salǵan. Smaǵulovtyń sózinshe, mýzeı birtindep ákimdiktiń ıeligine ótedi.