Shetelde qoldanylatyn joǵary tehnologıalyq onkologıalyq otanyń bári Almaty onkologıalyq ortalyǵynda da jasalady – onkohırýrg Nurlan Baltaev
ÓKQ brıfıńinde sóz alǵan Almaty onkologıalyq ortalyǵynyń hırýrgıalyq qyzmetiniń basshysy Nurlan Baltaev Ortalyqta naýqastardy emdeý úshin sońǵy tehnologıalar qoldanylyp jatqanyn, ortalyq mamandary jyl saıyn sheteldik tájirıbeden ótip, biliktiligin arttyratynyn atap ótti.
«Bizdiń keıbir otandastarymyz medısınalyq týrızmmen alys-jaqyn shetelge barady. Degenmen ol jaqta kórsetiletin kómekti bizdiń elde de tegin alýǵa bolady. Álemde bar ádistiń bárin biz Ortalyqta qoldanamyz. Biz uzaq ýaqyt boıy barlyq organǵa shaǵyn ınvazıvti hırýrgıalyq ádisterdi qoldanyp kelemiz. Biz qashanda shetelden kelgen áriptesterimizben tájirıbe almasamyz, olar bizdiń deńgeıimizdi, ásirese laparoskopıalyq hırýrgıany joǵary baǵalaıdy. Bes jyl buryn shaǵyn ınvazıvti hırýrgıa, ıaǵnı kesýsiz jasalatyn ota, bizde 10 paıyz bolǵan. Qazir bizde jasalatyn barlyq otanyń 50 paıyzdan astamy shaǵyn ınvazıvti ádispen jasalady. Onyń ústine bul otanyń barlyǵyna memleket kepildik beredi», – deıdi maman.
Onyń aıtýynsha, onkologıa tek hırýrgıalyq jolmen emdeletin aýrý emes, onkologıalyq aýrýdy emdeý qıyn ári qymbat.
Otadan basqa, naýqasqa hımıoterapıa jáne sáýlelik terapıa qajet bolýy múmkin.
Munyń barlyǵy, árıne, shetelde qyrýar qarjyny qajet etedi.
Ońtústik Koreıa, Túrkıa ne Germanıada qoldanylatyn barlyq zamanaýı tehnologıa bizdiń turǵyndarǵa tegin beriledi.
Tek 2023 jyldyń ózinde Almaty onkologıalyq ortalyǵynda 2681 hırýrgıalyq aralasý jasalǵan. Otalardyń 55% shaǵyn ınvazıvti ádisti qoldaný arqyly jasaldy.
Búginde onkologıalyq ortalyqta hımıoterapıanyń 50-ge jýyq túri, 40-tan astam maqsatty jáne gormondyq preparat qoldanylyp, sonyń arqasynda 18 790 naýqas hımıoterapıalyq em alǵan.
Qaterli isikke shaldyqqan 1064 naýqasqa 19 myńǵa jýyq sáýlelik terapıa seansy jasaldy.
10 myńǵa jýyq adam ambýlatorlyq hımıoterapıa kabınetinde em aldy.
Sóz sońynda sarapshy skrınıngtik tekserýden ótýdiń mańyzdylyǵyna toqtaldy.
«Emdeýdi izdegen keıbir adam balamaly medısınaǵa júgine bastaıdy, sol arqyly aýrýdyń asqyný prosesin ótkizip alady. Bizdiń elimizde arnaıy tegin skrınıngtik baǵdarlamalar bar. Qaterli isikti erte kezeńde anyqtaý úshin profılaktıkalyq tekserýden ótý kerek. Aýrýdy erte anyqtaǵan jaǵdaıda ǵana 90 paıyz emdelýge kepildik beriledi. Dárigerler shaqyrsa, arnaıy tekserýdi ótkizip almańyz. Taǵy da qaıtalap aıtamyn, qaterli isik neǵurlym erte anyqtalsa, emdeýdiń nátıjesi soǵurlym jaqsy bolady», - dep túıindedi sózin N.Baltaev.
Esińizge sala keteıik, Almaty onkologıalyq ortalyǵynda dárigerlerdiń bilimi men biliktiligin arttyrý, onkologıalyq aýrýlardy emdeýdiń jańa tehnologıalaryn engizý jumystaryna erekshe nazar aýdarylady jáne onyń barlyǵy eýropalyq standarttarǵa sáıkes keledi.