Ortalyq saılaý komısıasynyń tóraǵasy Nurlan Ábdirov 17-18 naýryzda halyqaralyq baıqaýshylarmen birqatar kezdesý ótkizdi, dep habarlaıdy Almaty-akshamy.kz OSK saıtyna silteme jasap.
Bul kúni ol Ázirbaıjan, Moldova, Mońǵolıa OSK Tóraǵalarymen, Túrkıa Respýblıkasy OSK múshelerimen, sondaı-aq Shanhaı Yntymaqtastyq Uıymynyń, UQSHU Parlamenttik Assambleıasynyń, Túrki memleketteri uıymynyń jáne Túrki Parlamenttik Assambleıasynyń delegasıalarymen kezdesti.
Ortsaılaýkom tóraǵasy delegasıa múshelerine Qazaqstan Respýblıkasy Parlamenti Májilisi jáne máslıhattary depýtattarynyń kezekten tys saılaýyn ázirleý men ótkizý jónindegi is-sharalardyń kúntizbelik josparyn usyndy, kezdesýlerge qatysýshylardy saılaý zańnamasyndaǵy reformalardyń iske asyrylý barysymen tanystyrdy, sondaı-aq kandıdattardy jáne saıası partıalardyń partıalyq tizimderin tirkeý qorytyndylary týraly habardar etti.
Kezdesýler aıasynda Nurlan Ábdirov saılaýshylar tizimine engizilgen Qazaqstan azamattarynyń, eldegi saılaý ýchaskeleriniń sany jáne aldaǵy saılaýǵa halyqaralyq baıqaýshylardy akredıtteý qorytyndylary týraly aıtty.
OSK tóraǵasy halyqaralyq baıqaýshylarǵa olardyń shaqyrtýǵa jaýap berip, saılaý prosesine monıtorıń júrgizý úshin Qazaqstanǵa kelgenderi úshin alǵysyn bildirdi. Nurlan Ábdirov elimizde saılaýdyń ulttyq zańnamaǵa jáne halyqaralyq standarttarǵa sáıkes ótýi úshin barlyq sharalar qabyldanyp jatqanyn atap ótti.
Ol sondaı-aq, Ortsaılaýkom ulttyq zańnamaǵa jáne joǵary demokratıalyq standarttarǵa sáıkes erkin jáne ádil saılaý ótkizý úshin barlyq qajetti sharalardy qabyldap jatqanyn, sondaı-aq aldaǵy saılaýdy baıqaýdy 12 halyqaralyq uıym men 41 elden 793 baıqaýshy júzege asyratynyn jetkizdi.
Óz kezeginde, delegasıa ókilderi kandıdattardy usyný jáne tirkeý kezeńderi boıynsha naqtylaıtyn suraqtar qoıyp, saılaý prosesin uıymdastyrýdyń joǵary deńgeıin atap kórsetti.
18 naýryzda Ortalyq saılaý komısıasynyń tóraǵasy Nurlan Ábdirov Belarýs jáne Reseı Odaǵy Parlamenttik jınalysy delegasıasynyń ókilderimen, Tájikstannyń saılaý jáne referendýmdar jónindegi ortalyq komısıasynyń Tóraǵasy Bahtıer Hýdoerzodamen kezdesýler ótkizdi jáne TMD Parlamentaralyq Assambleıasynyń halyqaralyq baıqaýshylar tobymen kezdesti.
Ol qonaqtardy aldaǵy Parlament Májilisi depýtattarynyń saılaýyna ázirlik pen ótkizý barysy, sondaı-aq saılaý ýchaskeleriniń daýys berý kúnine daıyndyǵy týraly qysqasha habardar etti, kezdesýlerge qatysýshylardyń saılaýdy uıymdastyrý men ótkizýge, olardyń qorytyndylaryn shyǵarý merzimderi men tártibine qatysty suraqtaryna jaýap berdi.
Kezdesýler barysynda OSK tóraǵasy elimizde halyqaralyq baıqaýshylardyń aldaǵy saılaýǵa qatysýyna, onyń ishinde Qazaqstannyń demokratıalyq damýyn qoldaýdyń belgisi retinde mańyzdy mán beriletinin atap ótti.
Delegasıalardyń basshylary saılaý qarsańynda elimizdegi tynysh, aqpeıildi jaǵdaıdy, saılaý naýqanyn uıymdastyrýshylar daıyndyǵynyń joǵary kásibı deńgeıin atap ótip, daýys berý kúni baıqaýdy obektıvti jáne beıtarap júzege asyrýǵa daıyn ekendikterin bildirdi.
Sondaı-aq, 18 naýryzda Nurlan Ábdirov IYU Bas hatshylyǵy saıası departamentiniń elshisi Seıd Sheıh Seıd Hassan Sharıf bastaǵan Islam yntymaqtastyǵy uıymynyń delegasıasymen kezdesý ótkizdi.
Kezdesý barysynda Ortsaılaýkom basshysy Qazaqstan Respýblıkasy Parlamenti Májilisi depýtattarynyń kezekten tys saılaýyna ázirlik pen ótkizý barysy týraly habardar etti, depýtattyqqa kandıdattardy tirkeý qorytyndylary týraly qysqasha aıtyp berdi, sondaı-aq kandıdattardy tirkeýdiń barlyq rásimderi konstıtýsıalyq normalarǵa sáıkes jarıalylyq jáne ashyqtyq qaǵıdattarynda júrgizilgenin atap ótti. Saılaý komısıalary azamattardyń konstıtýsıalyq quqyqtaryn iske asyrý úshin qajetti sharalar qabyldady.
Nurlan Ábdirov Islam yntymaqtastyǵy uıymynyń delegasıasy elimizdegi saılaý prosesterin baıqaýǵa birinshi ret qatysyp otyrǵanyn málimdedi. Ol sondaı-aq, halyqaralyq baıqaýshylarǵa olardyń shaqyrtýǵa jaýap berip, saılaý prosesine monıtorıń júrgizý úshin Qazaqstanǵa kelgenderi úshin alǵysyn bildirdi.
OSK tóraǵasy saılaý komısıalary saılaýdyń ulttyq zańnamaǵa jáne halyqaralyq standarttarǵa sáıkes ótýi úshin barlyq sharalardy qabyldap jatqanyn atap ótti.