6 qazan kúni elimizde AES qurylysy jónindegi jalpyhalyqtyq referendým ótedi. Prezıdent Toqaev pármen berip, Qazaqstan qoǵamy úshin asa mańyzǵa ıe osy elektoraldy proses bekitildi.
AES qurylysyna qatysty qoǵam pikiri ártúrli. Ony qoldaýshylar da, oǵan qarsylar da bar, jáne taraptar óz pikirlerin qoǵam talqysyna ashyq salýda. Dese de, «AES qurylysy týraly sheshimdi referendým arqyly, halyq pikirimen sanasa otyryp qabyldaımyz», - degen saıası bılik mańyzdy saıası naýqandy bastap ketti.
Kez kelgen saıası naýqannyń taǵy bir ajyramas bóligi – táýelsiz baqylaýshylar ekeni anyq. Táýelsiz baqylaýshysyz ótken saılaýdy zańdy, ádiletti ári shynaıy dep aıtý qıyn.
Referendýmǵa baılanysty el boıynsha baqylaýshylyq jasaıtyn uıymdar men bastamashyl toptardyń sany artýda. Baqylaýshylyq jasaımyz dep bastama kótergenderdiń biri – saıasattanýshy Nurbolat Nyshanbaı boldy.
Saıasattanýshy Nurbolat Nyshanbaı óziniń áleýmettik jelidegi paraqshasynda «Baqylaý qyrandary» atty táýelsiz baqylaýshylar tobyn jasaqtaıtynyn habarlady.
«Saıasattanýshy retinde maǵan elimizdegi, qoǵamdaǵy árbir proses qyzyqty ári mańyzdy. Azamattardyń saıası belsendiligi, azamattyq qoǵamnyń qalyptasýyna yqpaly, saılaýǵa halyqtyń qanshalyqty belsendi qatysýy men úshin árdaıym mańyzdy.
Jeke tájirıbemde álemniń birqatar elinde boldym, oqydym, tájirıbe almastym. Uqqanym, damyǵan kez-kelgen birtutas qoǵam úshin saılaý, referendým memlekettik deńgeıde mańyzdy shara. Eýropada oqydym, muhıttyń arǵy jaǵyndaǵy Avstralıada bilim aldym. Tek bilim alyp qana qoımaı, jergilikti halyqtyń turmys-salttary men áleýmettik belsendiligin de meńgerdim», - degen saıasattanýshy Eýropa elderiniń elektoraldy prosesterinen alǵan tájirıbesi men Qazaqstandaǵy saıası naýqandardy salystyra otyryp, alda bolatyn referendýmda táýelsiz baqylaýshylar tobyn jasaqtaıtynyn aıtty.
«Endi úsh aptadan keıin elimizde referendým ótedi. Bul referendýmnyń mańyzy da, máni de ózgeshe. Sebebi, osyǵan deıingi referendýmdar prezıdent merzimin uzartý, konstıtýsıaǵa qatysty bolsa, bul joly AES salyna ma, joq pa degen suraqqa halyq tańdaý jasaıdy. Saıasattanýshy bolǵandyqtan, mundaı prosesterden tys qala almaımyz», - deıdi saıasattanýshy.
Referendým kúni resmı bekitilgennen bastap elimizdiń túkpir-túkpirinde, sonyń ishinde Almaty, Astana sekildi Qazaqstan saıasatynyń mańyzdy draıverlerinde saıası naýqandardy (saılaý, referendým) baqylaıtyn uıymdar belsendiligin arttyrýda.
«Saıasattanýshy retinde bıylǵy saıası naýqanda baqylaýshylardy daıyndap, referendýmnyń ótý barysyn qadaǵalaý týraly ıdeıa usynamyn. Maqsat – referendýmdy demokratıalyq ınstıtýt retinde qalyptastyrýda úles qosý. Bul men úshin úlken tájirıbe bolmaq. Basty mindetimiz – referendýmnyń ótý barysyn baqylaý. Qazir bul qoǵamdyq baqylaýdy qalaı júzege asyra alamyz dep kúni-túni oılanyp, qurylymy men strategıasyn qalyptastyrýdamyz», - deıdi ol.