Keshende tenıs, sadaq atý zaly jáne fýtbol, voleıbol oınaý alańy bar.
Búgin Almaty qalasyndaǵy Nur-Múbárak ýnıversıtetinde salynǵan sport kesheniniń ashylý rásimi ótti, dep habarlaıdy Almaty-akshamy.kz
QMDB Baspasóz qyzmetiniń málimetinshe, ıgi is-sharaǵa Qazaqstan musylmandary dinı basqarmasynyń tóraǵasy Naýryzbaı qajy Taǵanuly qatysyp, ıgi tilegin jetkizdi.
«Biz shákirtterimizdiń rýhanı álemin baıytýmen qatar olardyń tán saýlyǵyna da kóńil bólip kelemiz. Halqymyz: «Táni saýdyń – jany saý» dep tekke aıtpaǵan. Densaýlyq – bizge berilgen amanat. Sport – densaýlyq kepili. Osy sport kesheninde uıymdastyrylatyn is-sharalar stýdentter arasynda salaýatty ómir saltyn nasıhattaýǵa serpin beredi dep senemin. Saýapty iske úles qosqan barsha azamattarǵa Alla razy bolsyn!» dedi Naýryzbaı qajy Taǵanuly.