Almatynyń qysy qalyń qarymen erekshelenip, turǵyndardyń kúndelikti ómirine eleýli qıyndyqtar týǵyzatyny belgili. Osyǵan oraı, Nur-Múbarak Egıpet ıslam mádenıeti ýnıversıtetiniń prorektory, PhD doktor Ershat Ońǵardyń bastamasymen ýnıversıtet aýmaǵyn jáne jaqyn mańdaǵy kóshelerdi qardan tazartý maqsatynda qysqy senbilik uıymdastyryldy, dep habarlaıdy aqshamnews.kz
Bul sharanyń basty maqsaty – ýnıversıtet ujymyn, stýdentter men oqytýshylardy ortaq iske jumyldyrý, sondaı-aq meshitke kelýshiler men qala turǵyndaryna qolaıly jaǵdaı jasaý boldy.
Qatal aýa raıyna qaramastan, senbilikke 100-den astam adam belsene qatysty. Stýdentter, oqytýshylar jáne meshit qyzmetkerleri oqý kesheni aýmaǵyn qardan tazartyp, kórshi kósheler men aýlalardy da nazardan tys qaldyrmady. Bul izgi is-shara jergilikti turǵyndardyń rızashylyǵyn týdyryp, olar ýnıversıtet ujymyna alǵystaryn bildirdi.
Prorektor Ershat Ońǵar senbiliktiń mańyzdylyǵyna toqtalyp:
«Islam – tazalyq dini. Qasıetti Quran men Paıǵambarymyzdyń (oǵan Allanyń ıgiligi men sálemi bolsyn) hadısterinde tazalyqtyń erekshe oryn alatyny aıtylǵan. «Tazalyq – ımannyń jartysy» degen hadıs musylman ómiriniń negizin aıqyndaıdy. Sonymen qatar, «Kórshi aqysy – Qudaı aqysy» degen sóz kórshige kómek kórsetýdiń musylmandyq mindet ekenin eske salady», – dep atap ótti.
Bul senbilik barysynda Nur-Múbarak ýnıversıtetiniń ujymy aýyzbirshiliktiń, yntymaqtyń jáne ortaq iske degen adaldyqtyń jarqyn úlgisin kórsetti. İs-shara qala turǵyndaryna Islam dininiń tazalyqqa erekshe mán beretinin is júzinde dáleldedi jáne olardy da ıgi isterge shabyttandyrdy.