2000 jyldardyń basynda álemdi jaýlap alǵan Nokia brendi smartfondar naryǵynan birjola ketetinin málimdedi, dep habarlaıdy aqshamnews.kz.
Nokia brendimen smartfon shyǵarý HMD Global kompanıasynyń sheshimimen toqtatylady. Endi kompanıa óz ónimderin HMD Key, HMD Arc, HMD Fusion sıaqty jańa ataýlarmen shyǵaratyn bolady. Bul ózgeris Nokia-nyń uzaq jyldar boıy smartfon naryǵynda ústemdik qurǵan dáýiriniń aıaqtalǵanyn bildiredi.
Nokia kompanıasynyń tarıhy birneshe onjyldyqtar boıy álemdik mobıldi telefon naryǵynyń kóshbasshysy bolyp esepteldi. Olardyń alǵashqy mobıldi telefondary keń tanymaldyqqa ıe boldy, biraq erekshe túrde tanylǵan Nokia 3310 modeli bolsa, naǵyz ıkonaǵa aınaldy. Ol óziniń beriktigimen, uzaq batareıasymen jáne óte qarapaıym, biraq tıimdi paıdalanýshy ınterfeısimen kópshilikke unady. Sonymen qatar, osy telefondarmen birge tanymal bolǵan «Zmeıka» oıyny, sol kezdegi uıaly telefondardyń eń qyzyqty qosymshalarynyń biri bolyp, ony barlyq jastaǵy adamdar súıip oınady.
Nokia óziniń eń úzdik úlgilerin shyǵaryp, basqa básekelesterdi artta qaldyra bildi. 2000 jyldardyń basynda kompanıa álemdegi eń tanymal mobıldi telefon óndirýshisi bolyp, naryqtaǵy eń kóp satylatyn brendter qatarynda boldy. Nokia-nyń brend ımıji "berik korpýs, batareıanyń qoldanylý uzaqtyǵy jáne senimdi jumys" dep ataldy. Kóptegen adamdar Nokia telefonyn sheksiz senimdilik pen sapa sımvoly retinde qabyldady.
2010 jyldary naryqtaǵy úlken ózgerister Nokia úshin qıyndyqtar ákeldi. Smartfondardyń shyǵýy, ásirese Apple jáne Samsung sıaqty iri brendterdiń naryqtaǵy úlesi artýy Nokia-nyń domınasıasyna qaýip tóndirdi. Qazirgi ýaqytta Nokia kompanıasy úshin básekelestikke tótep berý qıynǵa soqty, óıtkeni tehnologıanyń jyldam ózgerisi men tutynýshylardyń jańa talaptary Nokia-ny artta qaldyrdy.
Kompanıa 2016 jyly Microsoft-qa tıesili bolǵan kezeńde qaıta jańǵyrýǵa tyrysyp, smartfon shyǵarýdy jalǵastyrdy, biraq naryqtaǵy suranys turaqsyz boldy. Kompanıanyń naryqqa qaıta kirýi nátıje bermeı, sońǵy jyldary Nokia brendi smartfondar naryǵynda óziniń burynǵy ornyn taba almady.