Birneshe sulýlyq salony, sán shoýlarynda dızaınerlermen jumys, kosmetıka brendi, restoran kásibi - munyń bári bir áıel Ánel Álimovanyń kásibi. Ol - alpaýyt Amerıkaǵa budan eki jyl buryn kóshken qazaq qyzy. Arman, maqsat jáne jospar áreket etpeı júzege aspaıtynyn Ánel Álimova oqýshy kezinen túsinip alǵan. Qazaqstanda 15 jyl bıznespen aınalysqan keıipkerimiz búginde AQSH-qa kóship, talaı qazaqstandyqqa jumys usynyp otyr. Massaget.kz tilshisi keıipkermen 12 bıznesti júrgizgeni, 9 nesıeden qutylǵany, AQSH-qa qonys aýdarǵany, ol jaqta kásibin qalaı dóńgeletkeni týraly suhbattasty, dep habarlaıdy Almaty-akshamy.kz.
Ánel Álimova nebári 35 jasta. Ol - Jambyl oblysy, Býrnyı aýylynyń týmasy. Ol 1 jasqa tolǵanda otbasymen Qostanaıǵa qonys aýdarǵan. 11 jasynda Astanaǵa kóshken. Ánel Eýrazıa Ulttyq ýnıversıtetinde ekonomıs mamandyǵyn qyzyl dıplommen aıaqtaǵan. Odan keıin zań mamandyǵy boıynsha Pavlodar ýnıversıtetinde jáne Máskeý ýnıversıtetinde bilim alǵan.
Aýla sypyrýshy bolyp istegen
Ánel bala kezinen eńbekqor. Ol kishkentaı kezinde ata-anasynan asqanaǵa aqsha suraı bermeý úshin dúkenge aýla sypyrýshy bolyp ornalasqanyn aıtady. Sportqa jaqyn bolǵan soń, onyń tańda turyp jumysqa baratynynan ata-anasy habardar bolmaǵan. Ata-anasynda qyzy tańda júgirýge barady degen oı bolǵan. Tek birde anasy qoqys tógýge shyqqanda, dúken aldynda aýla sypyryp júrgen Áneldi kórip qalǵan. Keıin anasy dúkenshige kishkentaı balany jumysqa jegip qoıǵany úshin urysypty. Birneshe jyldan keıin Ánel kóshe sypyrýshy emes, dúkenshi bolyp jumysqa ornalasady. Keıin tipti nesıe alyp, óz dúkenin ashady.
Keıipkerimiz Qazaqstanda 14 jasynan jumys isteı basaǵan. Ol Qytaı arqyly kıim satyp, keıin restoran bıznesi men salon ashqan. Ol Amerıkaǵa kóshetinin sheshken soń, barlyq bıznesin satyp, tek salonyn qaldyrǵan. Ánel bıznesin dóńgeletýge bankten 9 nesıe alǵan kórinedi. Biraq Amerıkaǵa arman qýyp ketken otandasymyz elden kóshpes buryn barlyq bıznesin jabýdy jón sanaǵan. Sebebi, AQSH-ta ol bárin jańadan bastaýdy jón kórgen.
«Astanada Eýrazıa ulttyq ýnıversıtetinde oqyp júrip, jumys istep júrdim. Qytaıdan taýar alyp satatynmyn. Almaty arqyly Qorǵasqa, Úrimshige baratynmyn. Aýyr sómkelerdi tasıtynmyn. Keıin Astanada saýda úılerinen býtık ashtym. 3-kýrsta Amerıkaǵa Work and Travel baǵdarlamasy arqyly alǵash ret Nú-Iorkke keldim», - deıdi ol.
Amerıkadaǵy shytyrmanǵa toly ómiri jáne bıznesi
AQSH-qa kóshpes buryn Ánel bul elde 4 ret bolǵan. Onyń aıtýynsha, munda jalǵyz óziń bolsań, elge beıimdelý, jetistikke jetý qıyn.
«Qıyn bolaryn bildim. Negizi munda túbegeıli kóshemin dep josparlamadym. Biraq bul meniń qalaýymnyń biri boldy. 2021 jyly AQSH-qa barýdyń sáti tústi. Sol kezde «maǵan taǵdyr bolysyp tur ǵoı, nege qalyp, bıznes ashyp, baq synap kórmeske» degen oı keldi. Sóıtip, ulymmen muhıt asyp, kóship keldik. Eki jyl buryn ulym 12-de edi. Kóshýge josparym bolmasa da, keter aldynda páterimdi satý týraly usynys tústi. Men bul da bir belgi shyǵar dep Astanadaǵy eki bólmeli páterimdi satyp jiberdim. Sol qarajat bastapqy bir jylǵa jetti. Bul aqsha ulymnyń oqýyna, ımıgrasıalyq qujattarǵa, bızneske ketti», - deıdi keıipker.
Amerıkaǵa kelgende, ol alǵashqy jyly qujattarmen aınalysqan. Ánel kásibin ashpas buryn, túrli keńes pen sabaq alyp, kásip ashýdyń qyr-syryn úırengen. Qazir ol birneshe joba boıynsha kásibin júrgizip jatyr. Qol astynda 60-tan asa jumysshysy bar, olar - túrli ult ókilderi.
«Bir jyldyń ishinde 11 shoý ótkizdim. Dızaınerlermen birge jumys isteımiz, bet árleımiz. Olar - Nú-Iork, Brýklın, London, Darı shoý. EPN New York Fashion week, Orlando men Maıamı shoý. Tobymda 60 qyz bar. Buıyrsa, qyrkúıekte Nú-Iork sán aptalyǵynda jumys isteımiz, qazir soǵan daıyndalyp jatyrmyz. Dızaınerlermen jumys isteımiz. Armanym - qazaqstandyq dızaınerlerdi álemdik deńgeıge shyǵarý», - deıdi ol.
Sán shoýyna daıyndyq. Ánel jáne onyń komandasy. Áneldiń jeke arhıvinen
AQSH-ta kásip ashqyńyz kelse...
Áneldiń aıtýynsha, AQSH-ta kásip ashý ońaı. Bastysy - elge jetip alý.
«Munda týrısik vıza arqyly kelip, birden býhgalterıa arqyly korporasıa ashyp, ony Nú-Iork-te tirkeýge bolady. Eki aptadan keıin arnaıy ID-nómir beriledi, sol arqyly salyq tólep otyrýǵa bolady. Tipti Qazaqstanda otyryp, onlaın bıznes ashýǵa bolady. Óz bıznesin álemdik deńgeıde damytqysy keletinderge jaǵdaı jasalǵan. Aldymen korporasıany tirkeısiz. Keıin óz kórsetetin qyzmet túrińizge lısenzıa alasyz. Máselen, biz manıkúr, pedıkúr, makıaj, shash úlgisin jasaımyz. Ár masterdiń lısenzıasy men saqtandyrý kýáligi bolýy kerek. Odan basqa, bul jerden oryn jalǵa alǵyńyz kelse, nesıe tarıhyńyz jaqsy bolýy kerek. Munda bári nesıe tarıhyna qaraıdy, budan basqa, jınaq shotyńyzda aqsha bolýy shart. Kelisilgen oryndy jalǵa alǵannan keıin birden 6 aıǵa tóleısiz. Mysaly, jalǵa alǵan ornyńyz úshin 6 aıǵa birden 60 myń dollar, qujattarǵa shamamen 20 myń dollar, qural-jabdyqtardy qosa eseptegende 100 myń dollar shyǵyn ketedi. Teńgege shaqqanda bul 44 mıllıon teńge», - deıdi ol.
Keıipkerdiń aıtýynsha, elde budan basqa vızalar bar. Ol Talant vızasy arqyly kelgen.
«Investorlyq vızalar bar. Mysaly, AQSH-qa barmaı-aq, Qazaqstannan ne basqa elden Amerıkaǵa ınvestısıa quıǵysy keletinderge E-2 vızasy bar. Mysaly, Amerıkadan daıyn bıznes satyp alyp, oǵan 100 myń dollar kóleminde ınvestısıa quısań, osyndaı bıznes vıza beriledi. Bul qarajat bar, biraq ózin basqa kásipte synap kórgisi keletinderge jaqsy keledi edi. Munda qınalýdyń qajeti joq, bári daıyn bolady», - deıdi ol.
Áneldiń aıtýynsha, kásip ashý, árıne, ońaı, biraq zańdy durys bilmegen soń, qıyndyq kóp bolǵan.
Amerıkada ómir súrý úshin ne bilý kerek?
Nú-Iork - óte úlken qala. Munda 30 mıllıonǵa jýyq adam turady. Ánel AQSH-qa kelgisi keletinderge keńes berdi.
«Eń aldymen nazar aýdaratyn nárse - adamdarmen qarym-qatynas. Adam kóp bolǵasyn abaılap aralasý kerek. Al Florıda, Orlando, Tehas syndy shtattarda tynysh. Munda kóbi onlaın jumys isteıdi. Men Talant vıza aldym. Onda 10 krıterııdiń ishinde 3 krıterııge jaýap berý kerek. Bul - túrli salalardaǵy jetistikke jetken ımıgranttarǵa beriletin vıza túri. Negizinen qandaı da bir salada jetistigińiz bolsa, onda Amerıkaǵa osy vıza arqyly kelýdi usynamyn. Keıin GreenCard (AQSH-qa qonys aýdarǵandarǵa zańdy negizde jumys isteýge ruqsat etetin kýálik - esk.) alýǵa da septigin tıgizedi», - dedi keıipker.
Áneldiń aıtýynsha, amerıkalyqtar salyqqa asa jaýapkershilikpen qaraıdy, sebebi munda salyq tólemeı, jaltarǵandarǵa qatań jaza qoldanylady.
«Bıyl Amerıkaǵa qonys aýdarǵanyma 2 jyl bolady ǵoı. Ázirge bir ret tapsyryp kórdim. Bir qyzyǵy, munda kásipke qurtqan shyǵynnyń bárin býhgalterıada kórsetseń, kirgen kiristi tolyǵymen kásipke qaıta quısań, salyq tólemeýińe bolady. Bul jaǵdaıda tipti memleket saǵan kómek beredi. Arnaıy esepteıtin ádisi bar. Amerıkalyq jáne qazaqstandyq tutynýshylar arasy jer men kókteı. Munda básekelestik óte joǵary. Sondyqtan kásipkerler tutynýshylardy tartý úshin túrli aıla-tásilderge barady», - deıdi Ánel.
Ánel Álimova túrli kórmelerge jıi barady. Jaqynda ol The Makeup Show kórmesinde óz ónerin kórsetken alǵashqy qazaqstandyq boldy. Ol bul kórmede álemge tanymal brendtermen qatar óz jumysyn kórsetken. Odan basqa Ánel jaqynda Ýorren Baffet pen Bıll Geıtstiń sabaqtaryna qatysyp, tájirıbe jınaǵan.
Ánel armanyn bólisti. Keıipkerdiń bar armany - ulynyń baqyty men bolashaǵy. Ánel sol úshin qoldan kelgenniń bárin isteıdi. Odan basqa, keıipker Amerıkada mol tájirıbe jınap, Qazaqstanǵa oralǵan soń jastarǵa, kásibin endi qolǵa alǵandarǵa kómektesip, elimizdegi kásipti, ekonomıkany jańa deńgeıge ósirgisi keletinin aıtty.
Áneldiń jeke arhıvinen