Prezıdentimiz Qasym-Jomart Toqaevtyń bastamasymen biz ata-babalarymyzdyń tamyryna qaıta oralyp, qazaq halqynyń ejelgi dástúri – Ulttyq Quryltaıdy jańǵyrtýǵa kýá bolyp otyrmyz. Búgin Býrabaıda Memleket basshysynyń jetekshiligimen IV Ulttyq Quryltaıdyń eki kúndik otyrysy ótip jatyr. Bul otyrysta bılik ókilderi, qoǵam qaıratkerleri men sarapshylar elimizdiń áleýmettik-ekonomıkalyq damýyna kedergi keltiretin ózekti máselelerdi ashyq túrde talqylaýda.
Ulttyq Quryltaıda sóılegen sózinde Prezıdentimiz elimizdiń ekonomıkasynyń sońǵy bes jylda, 2019 jyldan bastap, turaqty 15,5 paıyzdyq ósim kórsetkenin atap ótti. Eldiń jalpy ishki ónimi (JİÓ) 288 mıllıard dollardy qurap, jan basyna shaqqandaǵy JİÓ 46 paıyzǵa artyp, 14 myń dollardy qurady. Negizgi kapıtalǵa salynǵan ınvestısıalar ótken jyly 19 trıllıon teńgeden asqan, ıaǵnı bir jarym ese ósken. Memleket basshysynyń aıtýynsha, memleket aýyl sharýashylyǵyna qoldaýdy edáýir arttyrdy. Ótken kúzde rekordtyq 27 mıllıon tonna astyq jınaldy. Sonymen qatar, 2019 jyldan beri elimizde 250-den astam stýdentter jataqhanasy salyndy, bul oryn tapshylyǵyn alty ese azaıtýǵa múmkindik berdi.
Búgingi tańda qazaqstandyqtar shetelge jıi demalýǵa shyǵa bastady. Memleket basshysy atap ótkendeı, «Bizdiń ulttyq kógildir pasportymyz onyń ıelerine 92 eldiń shekarasyn vızasyz kesip ótýge múmkindik beredi.» Qazaqstan halyqaralyq arenada qurmetke ıe bolyp, «ortasha derjava» dep atalady. Prezıdent Quryltaıǵa qatysýshylarǵa atap kórsetkendeı, BUU Bas Assambleıasy Almatyda Ortalyq Azıa men Aýǵanstan elderi úshin Turaqty damý maqsattaryna arnalǵan óńirlik ortalyq ashý týraly rezolúsıa qabyldady. Bul bizdiń elimizdiń álemdegi yqpaly men abyroıynyń aıǵaǵy bolyp tabylady, dep jazdy Kamalov Baqtıar áleýmettik paraqshasynda.