«Ózenmunaıgaz» burǵylaý basqarmasynyń qyzmetkerleri birqatar talaptar qoıǵanymen, olardyń keıbireýleri qoldanystaǵy zańdar men bekitilgen erejelerge qaıshy keledi, dep habarlaıdy aqshamnews.kz
Bas tartý sebepteri:
-
Zeınetkerlerdiń balalaryna kezekten tys jumys berý 2020 jyly bekitilgen erejelerdi buzady. Bul Jańaózendegi basqa jumyssyzdardyń quqyqtaryn shekteýi múmkin.
-
Qyzmetkerlerge arnalǵan áleýmettik qoldaý deńgeıi joǵary: ár qyzmetkerge jyl saıyn 3,8 mln teńge bólinedi.
Kompanıa narazylyq bildirýshilerdi jumysqa oralýǵa jáne máselelerdi bitimgerlik komısıasy arqyly sheshýge shaqyrdy. Júıeni jeke toptar úshin ózgertýge bolmaıdy.
«Ózenmunaıgaz» AQ málimdemesi
2024 jylǵy 12 qarashada «Ózenmunaıgaz» AQ (budan ári – ÓMG) burǵylaý basqarmasy qyzmetkerleriniń kásipodaǵy zańsyz narazylyq aksıasyn ótkizip, birqatar talaptaryn alǵa tartty. ÓMG basshylyǵy narazylyq bildirýshilermen turaqty kelissózder júrgizip keledi.
2024 jylǵy 3 jeltoqsanda Jańaózen qalasynda «QazMunaıGaz» UK AQ Basqarma tóraǵasynyń orynbasary Bekzat Abaıyldanov burǵylaý basqarmasy qyzmetkerlerimen kezdesip, olardy jumysqa shyǵýǵa shaqyrdy. Kelissózder nátıjesinde tómendegideı hattama jasaldy:
- Burǵylaý basqarmasy qyzmetkerleri zańsyz narazylyq aksıasyna qatysýdy toqtatyp, tolyq quramda jumysqa shyǵýy tıis;
- Hattamanyń birinshi tarmaǵy oryndalǵan jaǵdaıda, «QazMunaıGaz» jáne ÓMG tarapynan eshqandaı tártiptik sharalar qoldanylmaıdy;
- Barlyq talaptar Qazaqstan Respýblıkasynyń zańnamasyna sáıkes bitimgerlik komısıa aıasynda qaralady.
Hattama zańsyz narazylyq aksıasyna qatysýshylardyń nazaryna jetkizildi. Alaıda, ÓMG burǵylaý basqarmasy kásipodaǵynyń tóraǵasy qujatqa qol qoıýdan bas tartty.
Eske salamyz, Qazaqstan Respýblıkasynyń zańdaryna sáıkes, eńbek qatynastary tikeleı jumys berýshi men qyzmetkerler arasynda rettelýi tıis jáne úshinshi taraptardyń aralasýyna jol berilmeıdi.
