QR Táýelsizdigine - 30 jyl
Pákistanda «Beıbitshilik pen kelisim jolyndaǵy konfesıaaralyq jáne órkenıetaralyq dıalog» taqyrybynda halyqaralyq dóńgelek ústel ótti, dep habarlaıdy almaty-akshamy.kz Inform.kz-ke silteme jasap. İs-sharany Konfesıaaralyq jáne órkenıetaralyq dıalogty damytý jónindegi N.Nazarbaev ortalyǵy uıymdastyrdy.
Atalǵan jıyn QR Táýelsizdiginiń 30 jyldyǵy men Álemdik jáne dástúrli dinder lıderleri sezi hatshylyǵynyń aldaǵy XIX otyrysyn aqparat alańynda keńinen nasıhattaý maqsatynda uıymdastyryldy. Islamabadta ótken jıynǵa QR Syrtqy ister mınıstrligi men QR Aqparat jáne qoǵamdyq damý mınıstrligi qoldaý kórsetti. Qazaqstannyń Pákistan Islam Respýblıkasyndaǵy Elshiligi de kómek kórsetti. Dóńgelek ústeldiń moderatory Álemdik jáne dástúrli dinder lıderleri sezi hatshylyǵynyń qatysýshysy, Pákistannyń Islamdyq zertteýler ınstıtýtynyń bas dırektory Mýhammad Zıa ýl-Hak álemde bolyp jatqan ultaralyq jáne dinaralyq qaqtyǵystar aıasynda konfesıaaralyq dıalogty nyǵaıtýdyń mańyzyn atap ótti.
«Adamzat barlyq din ókilderi jumyla birlesip, kúsh-jigerin biriktirgende ǵana jeńe alatyn ortaq qaýip-qaterge tap bolady. Osy tusta Qazaqstan usynyp otyrǵan bastamalar teńdessiz sıpatqa ıe. Qazaqstan zamanaýı qoǵam bolmysyn túsine otyryp, memlekettiń ulttyq brendine jáne rýhanı, mádenı sımvolyna aınalǵan biregeı alań - Álemdik jáne dástúrli dinder lıderleriniń sezi aıasynda barlyq eldermen odan ári dıalogty damytýǵa nıetti ekeni qýantady», - dedi Muhammed Zıa ýl-Hak óz sózinde.
Konfesıaaralyq kelisimdi saqtaýdaǵy qazaqstandyq tájirıbe taqyrybyn Qazaqstannyń Pákistandaǵy Tótenshe jáne Ókiletti Elshisi Erjan Kıstafın jalǵastyrdy.
«El Táýelsizdiginiń 30 jylynda Qazaqstan dinaralyq damýdyń ózindik biregeı modelin qalyptastyryp úlgirdi. Barlyq órkenıet, dinder men mádenıetter arasyndaǵy ózara is-qımyldyń mańyzdy býyny bola otyryp, Qazaqstan túrli dinder men konfesıa ókilderin Álemdik jáne dástúrli dinder lıderleri seziniń bir alańynda biriktire aldy», - dedi E.Kıstafın.
N.Nazarbaev ortalyǵynyń basqarma tóraǵasy Bolat Sársenbaev osy jyldyń 5-6 qazan kúnderi Nur-Sultan qalasynda ótetin sıeziń XIX hatshylyǵyna jáne QR Parlamenti Senatynyń spıkeri – Álemdik jáne dástúrli dinder lıderleri sezi hatshylyǵynyń basshysy M.Áshimbaevtyń tóraǵalyǵymen ótetin jumys tobyna daıyndyq jumystaryn uıymdastyrý týraly, sıeziń strategıalyq mindetteri týraly aqparatpen bólisti.
Konfesıaaralyq jáne órkenıetaralyq dıalogty damytý jónindegi N.Nazarbaev ortalyǵy baspasóz qyzmetiniń málimetinshe, Álemdik jáne dástúrli dinder lıderleri seziniń negizgi ıdeıalaryn, maqsattary men mindetterin nasıhattaýǵa arnalǵan halyqaralyq dóńgelek ústelder serıasy Shveısarıa, Chehıa, Saýd Arabıasy, Armenıa, Vengrıa, Germanıa, Iran, Kanada, Qyrǵyzstan, Malaızıa, Túrkıada josparlanǵan.