Qazaqstan juldyzdary almatylyqtardy Kórisý kúni – Amal merekesimen quttyqtady
Búgin eki myńnan astam almatylyq men qala qonaqtary «Kók-Tóbege» jınalyp, bir-birin kóktemniń kelýimen quttyqtady, Naýryznama onkúndiginiń alǵashqy kúni – Kórisý merekesine oraı uıymdastyrylǵan teatrlandyrylǵan konsertti tamashalady.
Sahna tórinde elimizdiń súıispenshiligi men mahabbatyna bólengen, aty ańyzǵa aınalǵyn Roza Rymbaeva, Janar Aıjanova, Aıgúl Qosanova, «Jigitter» toby, Alma Amanjolova, sondaı-aq «Alataý» dástúrli óner teatrynyń ártisteri óner kórsetti. Mártebeli meımandar qatarynda belgili jazýshylar, mádenıettanýshylar, eńbek sińirgen óner qaıratkerleri jáne birqatar zıaly qaýym ókili boldy.
«Qadirmendi qaýym, búgin Qazaqstanymyzda úlken mereke – Naýryznama bastaldy. Qazaqtyń jańa jyly, kóktem keldi. Sondyqtan bir-birimizbenen kórisip, amandasyp, bir-birimizge jaqsy tilek aıtyp jatyrmyz. Men ózimdi baqytty ánshimin dep sanaımyn, sebebi meniń «Naýryz-dýman» ánim osy merekede mindetti túrde shyrqalady. Tek qana bir sahnada emes, búkil Qazaqstanda, tipti mektep oqýshylaryna deıin, aýyl-aımaqtarda, aýdandarda meniń osy ánim shyrqalyp jatady. Sondyqtan men – osy naýryzdy jyrlaıtyn baqytty ánshimin. Elimizge bıylǵy Naýryz baq-bereke ákelsin, birlik alyp kelsin. Qazaqstanymyz jyldan jylǵa kórkeıe bersin!», – dedi Qazaqstannyń Eńbek eri, Halyq artısi Roza Rymbaeva.
Almatylyqtarǵa erekshe syı retinde «Kók-Tóbedegi» aspaly jol búgin saǵat 9:00-den 13:00-ge deıin tegin jumys istedi. Sonyń arqasynda merekelik is-sharaǵa kelgen kórermen qatary kóp boldy.
«Búgin Kórisý kúni «Kók-Tóbeniń» tórinde toılanyp jatyr. Qurmetti almatylyqtar, barshańyzdy Amal merekesimen shyn júrekten quttyqtaımyn! Bul Amal kúniniń tárbıelik máni zor. Úlkenge qurmet, kishige izet kórsetip, aǵaıyn-týys arasyndaǵy baılanysty úzbeýge baǵyttaıtyn maǵynasy zor mereke. Qazaqta «Bataly el azbas» degen sóz bar. Sol sebepti búgingi Amal kúninde bir-birimizge jaqsy tilekterimizdi aıtyp, bataly bolaıyq! Amal kúni qutty bolsyn, aǵaıyn!», – dedi Qazaqstannyń eńbek sińirgen qaıratkeri, tanymal artıs Janar Aıjanova.
Aıta keteıik, Almatyda 14-23 naýryz aralyǵynda ótetin Naýryznama onkúndigi aıasynda 100-den astam túrli is-shara josparlanǵan. Olardyń ishinde kórmeler, spektáklder, sporttyq jarystar, tanymal artıserdiń qatysýymen ótetin konsertter jáne basqa da qyzyqty is-sharalar bar. Aýqymdy is-sharalardyń ańdatpalary Almaty qalasynyń Mádenıet basqarmasynyń @almatymadeniet paraqshasynda jáne Almaty qalasy ákimdiginiń resmı ınternet-resýrstarynda jarıalanady.
