Almaty qalasynda Naýryz meıramyn atap ótý aıasynda Bostandyq aýdanynyń oqýshylary arasynda ulttyq sport túrlerinen jarystar ótti.
Búgin №140 Muqaǵalı Maqataev atyndaǵy gımnazıada aýdannyń 9-11 synyptarynan 300-den astam oqýshy jınaldy.
«Biz mundaı is-sharalardy jyl saıyn uıymdastyramyz. Basty maqsatymyz – dástúrli qazaq oıyndaryn nasıhattaý, ulttyq qundylyqtardy nyǵaıtý, patrıotızmdi tárbıeleý jáne jastardyń sporttyq rýhyn damytý. Balalardyń fızıkalyq qabiletterin, komandalyq rýhyn shyńdaý jáne eń bastysy, salaýatty ómir saltyn qalyptastyrý óte mańyzdy», – dedi Bostandyq aýdandyq bilim bóliminiń basshysy Aıgúl Qasymbek.
Aýdan mektepteriniń oqýshylary qazaq kúresi, asyq atý, arqan tartý jáne basqa da sport túrlerinen ózderiniń kúshin, eptiligin jáne tózimdiligin kórsetti.
«Asyq oınaýdy maǵan atam úıretken, biz birge jıi asyq atysamyz. Dala órkenıetinen bastaý alatyn osyndaı ulttyq oıyndardyń búgingi kúnge deıin saqtalyp, memleket tarapynan qoldaý taýyp jatqanyna óte qýanyshtymyn», – dedi №165 mamandandyrylǵan lıseıiniń oqýshysy Sofıa Rı.
Uıymdastyrýshylar men qonaqtardyń aıtýynsha, jarys joǵary deńgeıde ótti. Barlyq qatysýshylar jaqsy fızıkalyq daıyndyqtaryn kórsetip, jeńiske degen jiger tanytty. Jeńimpazdar arnaıy gramotalarmen marapattaldy.