Almatyda Naýryz merekesine arnalǵan merekelik is-sharalar «Kósh. Naýryz – dýman» kerýeninen bastaldy. Naýryznama is-sharalary aıasynda negizgi konserttik baǵdarlamanyń bastamasy ispetti bolǵan teatrlandyrylǵan kerýen qala kóshelerimen júrip ótti. Merekelik kóshke batyr, búrkitshi, aqyn jáne basqa da obrazdaǵy 1000-nan astam adam qatysty. Sonymen qatar, qala turǵyndary men qonaqtary arbadaǵy kıiz úıdi, qyz kúımesin, qorjynǵa jibek mata men kilem artqan túıelerdi, qumaı tazylar men mergenderdi, jalpy jeti qazyna nyshandaryn kórdi.
Kerýennen keıin Astana alańynda mýzykalyq kompozısıa jáne «Naýryz shashý» teatrlandyrylǵan qoıylymynan bastalǵan «Naýryz – bereke bastaýy» atty merekelik konsert ótti. Sahnada 500-ge jýyq artıs óner kórsetti, atap aıtqanda Ázimbek Baılın, Ushqyn Jamalbek, Áset Esjan, «Sazgen sazy» fólklorlyq-etnografıalyq orkestri, «Alataý teatrlary», «Saltanat», «Shattyq», «Jetisý», «Baqyt», «Konsept» hory, Erlan Rysqalı, Tamara Asar, Aıgúl Elshibaeva, Dıas Muratqan, Qaraqat Ábildına, Erke Esmahan, Raım, Dılnaz Ahmadıeva, Roman Kım, Karına Abdýllına, Aıgúl Qosanova, Oleg Nıkıtın, Alekseı Lodochnıkov, Anna Ývarova jáne t.b. Dımash Qudaıbergenniń qoıylymy konsertke kelýshiler úshin tosynsyı boldy.
Mazmundy merekelik baǵdarlama JasStars toby, Súleımen Ibragımov, Jeńis Ysqaqova, MýzArt Life toby, Saıa Mahambet, «Asyl» toby, Mádı Rymbaev, Nurjan Tájikenov, Raım Ýaıs, İnjý, Aıjan Nurmaǵambetova, IL Canto toby, «Dervıshı» toby, Alau toby, «Alashuly» toby, Álı Oqapov, «Jigitter» toby, Móldir Áýelbekova syndy artıserdiń óner kórsetýimen saǵat 12:15-ten 15:00-ge deıin jalǵasady. Saǵat 15:00-den 17:00-ge deıin «Sazgen sazy» fólklorlyq-etnografıalyq orkestri men «Almaty áýenderi» artıseri óner kórsetedi.
Buǵan qosa, saǵat 18:00-den 22:00-ge deıin bir saǵattyq tehnıkalyq úzilisten keıin áıgili artıserdiń qatysýymen Zhuldyzdy Almaty festıvali bastalady. Kórermender úshin «Dosmuqasan» ansambli, «Úrker» toby, Seıfýllın Jolbarys, Nursultan Baıǵun, Raıym Ýaıys, Móldir Áýelbekova & Rabat ethno fusion, Jiger Aýypbaev, Dana Kentaı, «Dıeta KZ» toby, «Jigitter» toby, Aybekman, Adil, Ábdijappar Álqoja sahnaǵa shyǵady. Kesh sońynda Qaırat Nurtas «Sen meniń adamymsyń», «Baıqa», «Aq kelin», «Perzent syry», «Bári durys pa?» jáne «Almaty túni» syndy tanymal ánderdi shyrqaıdy.
Aıta keteıik, merekelik is-sharalar Abaı alańynda da ótip jatyr. Munda qonaqtar men turǵyndar úshin Naýryzdy toılaıtyn elderdiń mádenıeti men dástúrlerin biriktiretin «Nauryz Fest» halyqaralyq festıvali uıymdastyryldy.
- Festıvál bir shańyraq astyna Qazaqstan, Qyrǵyzstan, Ózbekstan, Ázirbaıjan, Tájikstan, Túrkıa, Mońǵolıa jáne Bashqurtstannyń Naýryz meıramyn toılaý dástúrlerin biriktiredi.
- Qazaqstandyqtarmen qosa sheteldik qonaqtar festıválde ózderiniń sándik-qoldanbaly ónerin, salt-dástúrlerin, halyq mýzykasyn usynady.
- Abaı alańynda qatysýshy elderdiń shatyr-sheberhanalary, túrli ulttyq taǵamdary bar aspazdyq pavılondar men fýdkort, shańyraǵy bar sahna ornatyldy.
Sonymen birge, 22 naýryz kúni qazaqstandyq estrada juldyzdarynyń qatysýymen saǵat 19:00-den 22:00-ge deıin keshki konsert ótedi.