Almatyda Naýryz meıramyn toılaý jalǵasyp jatyr. Búgingi Yntymaq kúni qala kóshelerimen «Kósh. Naýryz – dýman» atty teatrlandyrylǵan kerýen ótti. Oǵan ulttyq kıim kıgen 1000-nan astam adam qatysty.
Batyr, búrkitshi, aqyn jáne basqa da obrazdaǵy adamdar qala turǵyndary men qonaqtaryn qýantty. Ájelerdiń shashýy men aqyndardyń óleńi kerýenge ajaryn asha tústi. Arbadaǵy kıiz úı, qyz kúımesi, qorjynǵa jibek mata men kilem artqan túıeler, sonymen qatar, qazaq halqynyń jeti qazyna nyshandary ulttyń mádenıeti men dástúriniń tamyry tereńde ekenin eske saldy.
Kerýen Abaı atyndaǵy alańda bastalyp, Astana alańynda márege jetti, onda búgin qala turǵyndary men qonaqtary úshin 1000-nan astam artıserdiń qatysýymen negizgi merekelik konsert ótedi.
Aıta keteıik, búgin jáne erteń qalanyń barlyq aýdanynda konsertter men basqa da merekelik is-sharalar uıymdastyrylady.
Alataý aýdanynda konserttik baǵdarlama 21-23 naýryz aralyǵynda saǵat 11:00-den 14:00-ge deıin «Alataý» dástúrli óner teatrynyń aldyndaǵy alańda (Nurkent sh/a., 6) úsh kún boıy ótedi.
Áýezov aýdanynda konserttik baǵdarlama 22 naýryzda saǵat 11:00-den 15:00-ge deıin aýdan ákimdiginiń aldyndaǵy alańda (Altynsarın dańǵyly, 23) ótedi.
Bostandyq aýdanynda kıiz úıler kórsetilimi, qoldan jasalǵan buıymdar kórmesi jáne konserttik baǵdarlama 21 naýryzda saǵat 11:00-den 14:00-ge deıin «MEGA Center Alma-Ata» SOO aldyndaǵy alańda (Rozybakıev kóshesi, 247a) ótedi.
Jetisý aýdanynda qazaqstandyq estrada juldyzdarynyń qatysýymen konserttik merekelik is-sharalar 21 naýryzda Qulager shaǵyn aýdanyndaǵy «Gúlder» saıabaǵynda (Serikov kóshesi, 2a) saǵat 10:00-den 14:00-ge deıin ótedi.
Túrksib aýdanynda ulttyq sport túrleri boıynsha kórsetilimderi bar merekelik konsertter 21 naýryz kúni saǵat 11:00-den 15:00-ge deıin S.Seıfýllın atyndaǵy saıabaqta (Sholohov kóshesi men Sherbakov kóshesiniń qıylysy) ótedi.
Naýryzbaı aýdanynda konserttik baǵdarlama 22 naýryz kúni saǵat 11:00-den 15:00-ge deıin Abaı dańǵylynda (Alataý dańǵyly men Stroıtelnaıa kóshesiniń arasynda) ótedi.
Almaly aýdanynda negizgi is-sharalar «Astana» alańynda ótedi: 21 naýryz 11:00-den 22:00-ge deıin jáne 22 naýryz 12:00-den 22:00-ge deıin merekelik baǵdarlama, teatrlandyrylǵan shoý, sırk ártisteriniń qoıylymy, ulttyq sport túrleri boıynsha oıyndar jáne t.b.
Almatynyń Arbatynda (Jibek joly dańǵyly men Panfılov kóshesiniń qıylysy) 21 naýryz kúni saǵat 11:00-den 19:00-ge deıin qýyrshaq teatrynyń akterleri, halyq janrynyń artıseri óner kórsetedi, sonymen qatar, kitap jármeńkesi men qolónershiler kórmesi ótedi. 22 naýryzda saǵat 13:00-den 18:30-ǵa deıin etno-folklorlyq ujymdar óner kórsetedi.
Sondaı-aq, Panfılov jaıaý júrginshiler kóshesinde Júrgenov atyndaǵy QazUÓA ǵımaratynyń aldynda 21 naýryz kúni saǵat 11:00-den 18:00-ge deıin qýyrshaq teatrynyń, tanymal mýzykalyq ujymdardyń jáne óner akademıasynyń stýdentteriniń merekelik baǵdarlamasy ótedi. 22 naýryzda saǵat 13:00-den 18:30-ǵa deıin etnomádenı birlestikterdiń shyǵarmashylyq ujymdarynyń, «Almaty áýenderi» artıseriniń jáne vokaldyq-aspaptyq ansámbldiń qatysýymen konserttik baǵdarlama ótedi.
Medeý aýdanynda 21 naýryz kúni saǵat 12:00-de Abaı atyndaǵy alańda Naýryz meıramy aıasynda Naýryzdy toılaıtyn elderdiń mádenıeti men dástúrlerin biriktiretin «Nauryz Fest» halyqaralyq festıvali ótedi. Sondaı-aq, 21 jáne 22 naýryzda saǵat 19.00-den 22.00-ge deıin estrada juldyzdarynyń qatysýymen konsert ótedi.